बेइजिङ । उत्तरपश्चिम चीनको गान्सु प्रान्तमा शुक्रबार रेल दुर्घटना हुँदा नौ जनाको मृत्यु भएको स्थानीय अधिकारीहरूले बताएका छन् ।
चिनियाँ रेलवे लान्झाउ ब्युरोका अनुसार लान्झाउ–सिनजियाङ रेल्वेको जिन्चाङ खण्डमा शुक्रबार बिहान ५.२५ बजे रेल दुर्घटना भएको हो ।
प्रहरी र स्थानीय मानिसले रेल दुर्घटनाका मृतक एवम् घाइतेको उद्धार गरेका थिए । घाइतेहरूको स्थानीय अस्पतालमा उपचार भइरहेको छ ।
फ्रान्स–चीन ढुवानी रेलसेवा सुरु
यसैबिच, चीन र युरोपबिच फ्राइट (सामान ढुवानी) का लागि नयाँ रेलसेवा बुधबारदेखि सुरु भएको छ । यो सेवा सुरु भएसँगै चीनको उत्तरी प्रान्त साङ्सी र फ्रान्सबिच सोझो रेलसम्पर्क स्थापित भएको छ ।
५० वटा कन्टेनर लोड गरिएको रेल मध्यसाङ्सी प्रान्तबाट बुधबार फ्रान्सको राजधानी पेरिसका लागि प्रस्थान गरेको थियो । यो रेलले करिब ११ हजार किलोमिटरको दुरी तय गर्ने छ ।
यो रेल मङ्गोलिया, रसिया, बेलारुस, पोल्यान्ड र जर्मनी हुँदै करिब २० दिनमा फ्रान्स पुग्ने चिनियाँ रेलसेवाले जनाएको छ ।
साङ्सी जिनाउ लजिस्टिकका व्यवस्थापक वाङ गोकिङले उक्त रेलमा फिटनेसका सामान र ९० हजार डिस्पोजेबल स्टेराइल सिरिँजसमेतका अन्य सरसामान रहेको जानकारी दिनुभयो । (रासस–सिन्ह्वा)
