जेरुसेलम । इजरायलको राष्ट्रपतिमा वरिष्ठ राजनीतिज्ञ इसाक हर्जोग निर्वाचित हुनुभएको छ ।
देशको एघारौँ राष्ट्रपतिका रूपमा निर्वाचित हर्जोगले १२० सदस्यीय इजरायली संसदबाट ८७ मत प्राप्त गर्नुभएको थियो । इजरायलमा हाल रुभेन रिभलिन राष्ट्रपति हुनुहुन्छ । उहाँको कार्यकाल अर्को महिना समाप्त हुँदै छ ।
आलङ्कारिक मानिने इजरायलको राष्ट्रपतिको कार्यकाल सात वर्षको हुन्छ । हर्जोगले राष्ट्रपतिका अर्का उम्मेदवार मेरियम पेरेजलाई पराजित गर्नुभएको थियो ।
चुनावी नतिजा सार्वजनिक भएलगत्तै नवनिर्वाचित राष्ट्रपति हर्जोगले आफू सबै जनताको राष्ट्रपति हुने विश्वास व्यक्त गर्नुभयो ।
६० वर्षीय हर्जोगले भन्नुभयो– “हामीले इजरायलको अन्तर्राष्ट्रिय छविलाई सुदृढ गर्नु पर्ने छ र इजरायल विरोधी भावनालाई हटाउन प्रयत्न गर्नुपर्ने छ । साथै हाम्रो लोकतन्त्रको स्तम्भलाई संरक्षण गर्नुपर्दछ ।”
हर्जोग यसअघि लाबोर पार्टीको पूर्व प्रमुख रहनुका साथै २०१५ मा संसदमा विपक्षी दलको नेता हुनुहुन्थ्यो । उहाँ २०१५ का चुनावमा प्रधानमन्त्री बेन्जामिन नेतन्याहुको विरुद्धमा चुनावी मैदानमा उत्रिनुभएको थियो ।
राष्ट्रपतिमा निर्वाचित हुन इजरायली संसद नेसेटको १२० स्थानमध्ये कम्तीमा ६१ स्थान प्राप्त गर्नुपर्दछ । विजयी उम्मेदवारले आगामी जुलाई ९ बाट कार्यभार सम्हाल्ने छन् । (रासस–एपी)
