काठमाडौं । जनता समाजवादी पार्टी (जसपा) को महन्थ–राजेन्द्र पक्षले अध्यक्ष उपेन्द्र यादवलाई पार्टीबाट निष्कासन गरेको छ। यादवले ठाकुर पक्षका चार नेतालाई निष्कासन गरेको केहीबेरपछि ठाकुर पक्षले पनि यादवलाई कारवाही गरेको हो ।
मंगलबार दिउँसो यादव पक्षले अध्यक्ष महन्थ ठाकुर, राजेन्द्र महतो, लक्ष्मणलाल कर्ण र सर्वेन्द्रनाथ शुक्ललाई पार्टीबाट निष्कासन गरेका थिए।
यसैबीच ठाकुर पक्षले आगामी दिन कसरी अघि बढ्ने भन्ने बारेमा आन्तरिक छलफलमा जुटेका छन् । स्रोतका अनुसार महन्थ ठाकुर र स्वास्थ्य तथा जनसंख्यामन्त्री ह्रदयश त्रिपाठीबिच नयाँ पार्टी दर्ता गरेर जानेबारे छलफल भइरहेको छ ।
चार नेता निष्काशित गरेपछि जसपा औपचारिक रुपमा विभाजन भएको छ । महन्थ पक्षले प्रधानमन्त्री केपी शर्मा ओली सरकारमा सहभागी हुने निर्णय गरिसकेको छ ।
२०७७ वैशाख १० गते तत्कालीन राष्ट्रिय जनता पार्टी (राजपा) र संघीय समाजवादी पार्टीबीच एकता भएको थियो।
चार नेता निष्कासन गरेको जानकारीआयोगलाई
यता यादव पक्षले अध्यक्ष महन्थ ठाकुरसहित ४ नेतालाई पार्टीबाट निष्कासित गरेको जानकारी निर्वाचन आयोगलाई गराएको छ।
राजनीतिक दल सम्बन्धी ऐन २०७३ को दफा ५१ को (१) (२) र (३) बमोजिम दलको दर्ता किताबबाट नाम हटाई अद्यावधिक गर्न आयोगलाई अनुरोध गर्दै पत्र पठाइएको छ।
यसअघि गएको बुधबार उनीहरु चारै जनालाई स्पष्टीकरण सोधिएको थियो। सो स्पष्टीकरणको जवाफ नदिएपछि चौबीस घण्टे थप स्पष्टीकरण सोधेका थिए। तर, त्यसको पनि जवाफ नदिएपछि पार्टीबाट उनीहरुलाई निष्काशन गरिएको हो ।
