टोकियो । जापानमा फाइजरको कोरोना भाइरस विरुद्धको खोप १२ देखि १५ वर्षसम्मका बालबालिकालाई पनि दिइने भएको छ ।
स्वास्थ्य मन्त्रालयअन्तर्गतको विज्ञहरूको समूहले फाइजरको खोप बालबालिकालाई पनि दिन सकिने गरी स्वीकृति दिएको हो ।
फाइजरको खोप प्रयोगका लागि यो उमेर समूहलाई अहिले थप गरिएको हो । १६ वर्ष वा सोभन्दा बढी उमेरका व्यक्तिलाई भने यसअघि देखि नै यो खोप उपयोग हुँदै आएको थियो ।
मन्त्रालयले आगामी सोमबार सो समूहका लागि फाइजर खोप निःशुल्क उपलब्ध गराउने निर्णय सरकारले गर्ने अपेक्षा पनि गरेको छ ।
यो खोप उनीहरूलाई उपयोग गर्न उपयुक्त हुन्छ कि हुँदैन भन्नेबारेमा चिकित्सकीय परीक्षणका लागि दुई हजार २६० बालबालिकालाई लगाइएको थियो ।
परीक्षणबाट सकारात्मक नतिजा आएपछि विज्ञ तथा सरोकारवालाले खोप १२ देखि १५ वर्षसम्मका बालबालिकालाई पनि लगाउने अनुमति दिन सकिने सुझाव दिएका हुन् ।
स्वास्थ्यकर्मीसहित अग्रपङ्क्तिमा खटिएका वयस्क व्यक्तिलाई फाइजरको खोप लगाउने अनुमति भने जापानमा गत फेब्रुअरीमा नै दिइएको थियो । (रासस–एएनआई)
