मस्को । मालीको संवैधानिक अदालतले उपराष्ट्रपति कर्णेल अस्सिमी गोइतलाई देशको अन्तरिम राष्ट्रपति घोषणा गरेको छ ।
एक हप्ताअगाडि अन्तरिम राष्ट्रपति र प्रधानमन्त्रीलाई सेनाले पक्राउ गरेर नियन्त्रणमा राखेको थियो । उनीहरूलाई राजधानी बामाको नजिकै रहेको एक सैन्य कार्यालयमा राखिएको जनाइएको छ ।
उनीहरूले कानुनको उल्लङ्घन गरेकाले पदबाट हटाइएको उपराष्ट्रपति गोइतले गबताउनुभएको थियो । उहाँले नै देशको सैनिक परिषद्को नेतृत्व गर्नुभएको छ । त्यसैले नै शासन गर्ने जनाइएको छ ।
“अर्को व्यवस्था नभएसम्मका लागि उपराष्ट्रपतिले नै अन्तरिम राष्ट्रपतिको रूपमा देशको नेतृत्वदायी जिम्मेवारी निर्वाह गर्नुहुने छ, उहाँकै नेतृत्वमा सरकार सञ्चालन हुने छ” अदालतद्वारा जारी आदेशमा उल्लेख गरिएको छ ।
संयुक्त राष्ट्र सङ्घले भने राष्ट्रपति र प्रधानमन्त्रीलाई गिरफ्तार गरिएको घटनाप्रति आपत्ति जनाएको छ । उसले उनीहरूलाई बिनासर्त तत्काल रिहा गर्न पनि माग गरेको छ ।
“जसले उहाँहरूलाई नियन्त्रणमा राखेका छन्, उनीहरूले नै यसबारेमा तत्काल जवाफ दिने छन् भन्ने हामीले विश्वास लिएका छौँ” राष्ट्रसङ्घीय उच्च अधिकारीद्वारा जारी वक्तव्यमा उल्लेख गरिएको छ ।
अफ्रिकी विभिन्न अन्तर्राष्ट्रिय संस्थासँग आफूहरू निरन्तर निकट सम्पर्कमा रहेको र मालीमा उत्पन्न सङ्कटलाई सकारात्मक तरिकाले अन्त्य गर्न प्रयास गरिरहेको पनि राष्ट्रसङ्घीय अधिकारीले जनाएका छन् । (रासस÷एएनआई)
