जेनेभा । विश्व स्वास्थ्य सङ्गठन (डब्ल्युएचओ) ले कोेभिड–१९ उत्पत्तिबारेको अध्ययनलाई राजनीतिकरण नगर्न आग्रह गरेको छ ।
अध्ययनको सम्पूर्ण प्रक्रियालाई राजनीतिले बिगारेकोे सो सङ्गठनले दावी गरेको छ ।
जेनेभामा मे २९, २०२१ शुक्रबार डब्ल्युएचओले गरेको पत्रकार सम्मेलनमा बोल्दै डब्ल्युएचओ स्वास्थ्य सङ्कटकाल कार्यक्रमका कार्यकारी निर्देशक माइक रायनले भन्नुभयो– “सम्बन्धित सबैले यस (कोभिड–१९ को उत्पत्ति) को विषयलाई राजनीति होइन, वैज्ञानिक तरिकाले हेर्नुपर्छ; अनुसन्धानमा सघाउनुपर्छ र अध्ययनको रिपोर्ट विवादरहित बनाउनुपर्छ ।”
“यदि तपाईंले वैज्ञानिकको कामको अपेक्षा गर्नुहुन्छ भने तपाईं वैज्ञानिकसँग सहकार्य गर्न सक्नुहुन्छ र यसबाट तपाईंले चाहनुभएको जवाफ प्राप्त गर्नुहुन्छ । वास्तवमा भाइरसको उत्पत्ति पत्ता लगाउन दोषारोपणरहित वातावरण आवश्यक छ । भाइरस उत्पत्तिको विषय राजनीतिक दोष नलागेको हुनुपर्छ ।”
डब्ल्युएचओका वरिष्ठ अधिकारीले सार्स–कोभ–२ भाइरसको सम्भावित उत्पत्तिसम्बन्धी समाचार, प्रमाण वा नयाँ सामग्रीका साथ “सञ्चार माध्यममा अधिक छलफल भएको” र यो चिन्ताको विषय भएको बताएका छन् ।
सबै मुलुकका सरकारले सँगै मिलेर काम गर्ने र भाइरसको मूल अध्ययन सफलतापूर्वक सम्पन्न गर्नका लागि वातावरण सिर्जना गर्न आह्वान गर्दै रायनले भन्नुभयो– “यस मुद्दाको वर्तमान राजनीतिकरणले डब्ल्युएचओलाई जवाफ दिन कठिन बनाएको छ ।”
भाइरसको उत्पत्ति पत्ता लगाउन धेरै अध्ययन र बहुअभियान आवश्यक पर्दछन् । यसका लागि सहयोग, खुल्लापन र समय आवश्यक रहेको उहाँको भनाइ थियो ।
