कञ्चनपुर । कञ्चनपुरको वेदकोट नगरपालिकामा रहेको वैजनाथधाम वृद्धाश्रम सेवाकेन्द्रमा एक जेष्ठ नागरिक कुटिएको घटनाप्रति वृद्धाश्रम व्यवस्थापन समितिले दुःख व्यक्त गरेको छ । समितिका कार्यबहाक अध्यक्ष मोहनबहादुर चन्दले विज्ञप्ति प्रकाशित गरी घटनाप्रति समितिले क्षमायाचना गरेको बताउनुभएको छ ।
वृद्धाश्रमका कर्मचारी बहादुर बिष्टले मंगलबार एक वृद्धलाई कुटपिट गरी आश्रमबाट धपाएको समाचार सार्वजनिक भएको थियो । वृद्धाश्रमबाट निकालिएका ती वृद्धलाई स्थानीय महिला समाजसेवी वेदकोट नगरपालिका वडा नं ७ का सदस्य वीरबहादुर धामीले उद्धार गरी आश्रममा फर्काउनु भएको थियो ।
वृद्धलाई आश्रममा फर्काउने क्रममा वृद्धाश्रमका हेरालु विष्टले पुनः गालीगलौज गरेका थिए भने वडा सदस्य धामी र महिला समाजसेवी गुरुङलाई समेत धम्की दिएका थिए । समाचार संकलनका क्रममा पुगेका युगदर्शनकर्मीमाथि पनि विष्टले दुर्व्यवहार गरे ।
वृद्धाश्रम व्यवस्थापन समितिले लामो समयदेखि वृद्धवृद्धाको सेवामा खटिएका बहादुर विष्टबाट आवेशमा उक्त घटना हुन पुगेको भन्दै आइन्दा त्यस्तो नहुने स्पष्ट पारेको छ । समितिले वृद्धाश्रम सञ्चालनको लागि विगतमा जस्तै सबैसँग सहयोगको अपेक्षा पनि गरेको छ ।
यो पनिः वृद्धाश्रमको रेखदेख गर्ने व्यक्तिबाटै वृद्धमाथि कुटपिट
