पुष्कर भट्ट, कञ्चनपुर ।
कञ्चनपुरको वेदकोट नगरपालिकामा रहेको वृद्धाश्रमका एक जेष्ठ नागरिक संरक्षकबाटै कुटिएका छन् । वैजनाथधाम वृद्धाश्रम सेवाकेन्द्रमा रेखदेख गर्न खटाइएका बहादुर बिष्टले मंगलबार कुटपिट गरी ती वृद्धलाई आश्रमबाट धपाएका हुन् ।
वृद्धाश्रमबाट निकालिएका ती वृद्धलाई स्थानीय महिला समाजसेवी समीक्षा गुरुङले फेला पार्नुभएको थियो । उनलाई गुरुङ र ७ नं वडा सदस्य वीरबहादुर धामीले उद्धार गरी आश्रममा फर्काउनु भएको थियो ।
वृद्धलाई आश्रममा फर्काउने क्रममा वृद्धाश्रमका हेरालु विष्टले पुनः गालीगलौज गरेका थिए भने वडा सदस्य धामी र महिला समाजसेवी गुरुङलाई समेत धम्की दिएका थिए । समाचार संकलनका क्रममा पुगेका युगदर्शनकर्मीमाथि पनि विष्टले दुर्व्यवहार गरे ।
वेदकोट नगरपालिका वडा नं ७ र ८ को सीमास्थित रमणीय रौटेला मन्दिर छेउमा रहेको सो वृद्धाश्रममा अहिले करिब २५ जना वृद्धवृद्धा छन् । २०५७ सालमा स्थापना भएको वृद्धाश्रम २०६५ सालदेखि सञ्चालनमा आएको हो ।
स्थानीय जनता र विभिन्न दाताहरुको सहयोगबाट सञ्चालित सो वृद्धाश्रमलाई अहिलेसम्म सयौं जेष्ठ नागरिकले आश्रम बनाएर सेवा लिएका छन् । तर, बेलामौकामा वृद्धहरुमाथि दुर्व्यवहार हुने गरेको उनीहरुको गुनासो छ ।
मंगलबार मात्रै पनि एक वृद्धाले आफूहरुलाई जथाभावी दिसा गर्छन् भनेर धेरै नखान भनिएको र गालिगलौज गर्ने गरिएको गुनासो गरिन् । वृद्धाश्रमलाई आफ्नो बुढेशकालको सहारा बनाइएका ज्येष्ठ नागरिकमाथि हेरालुबाट भएको दुर्व्यवहार दुखद रहेको र आश्रमले उनीहरुमाथि सम्मानित व्यवहार गर्नुपर्ने समाजसेवी गुरुङले बताउनुभयो ।
