गाजासिटी । इजरायलले बिहीबार बिहानैदेखि गाजापट्टीका विभिन्न स्थानमा भीषण हवाइ हमला सुरु गरेको छ । आक्रमणबाट कम्तीमा एक जना प्यालेस्टिनी नागरिकको मृत्यु हुनुका साथै अन्य धेरै जना घाइते भएका छन् ।
गाजाका विद्रोही हमास समूह विरुद्धको प्रत्याक्रमण रोक्न अमेरिकी दबाबलाई बेवास्ता गर्दै प्रधानमन्त्री बेन्जामिन नेतन्याहूले सैनिक कारबाहीलाई निरन्तरता दिनुभएको छ । पछिल्लो युद्ध सुरु भएयता गाजामा सरकार चलाइरहेको हमासका लडाकुले इजरायलमाथि हजारौँ क्षेप्यास्त्र प्रहार गरिसकेको छ ।
बिहीबार सबेरै गाजा सहरलाई विस्फोटनका आवाजले हल्लाइदिएको थियो भने आकासमा आगोका लप्का माथिसम्म देखिएका थिए । इजरायली आक्रमण मध्यसहर डायर अलबलाह र दक्षिणतर्फको खान युनिस सहरमा पनि भएका थिए ।
बिहान हेर्दा खान युनिस सहरका पाँच स्थानीयवासीका घर बम आक्रमणबाट ध्वस्त भएका पाइएका थिए । गाजा सहरको व्यापारिक केन्द्रका रूपमा रहेको अलसफ्तावी स्ट्रिटमा पनि भीषण आक्रमण भएको थियो ।
इजरायली सेनाले हमासका कमान्डरका कम्तीमा चार वटा घर ध्वस्त पारेएको जनाएको छ । खान युनिसमा खवाल्डी परिवारको दुई तले भवन क्षतिग्रस्त भएको छ । डरका कारण आÇनो घर छाडेर ११ सदस्यीय खवाल्डी परिवार नजिकैको अर्को घरमा बस्न थालेको थियो । तर आक्रमणबाट उनीहरू पनि घाइते भएका र अस्पताल भर्ना गरिएको छिमेकी शाकेर अलखोजोनदारले बताउनुभयो ।
हालको सैनिक कारबाहीबाट सयौँ व्यक्तिको ज्यान गइसकेको भन्दै अमेरिकी राष्ट्रपति जो बाइडेनले कारबाही रोक्न इजरायली प्रधानमन्त्री नेतन्याहूलाई दुई पटक आग्रह गरे पनि त्यसलाई बेवास्ता गर्नुभएको छ । गत साता लडाईं सुरु भएयता दुई मुलुकबिचको तिक्तता पहिलोपटक सतहमा देखा परेको छ ।
सैनिक मुख्यालयको भ्रमणपछि प्रधानमन्त्री नेतन्याहूले बुधबार अमेरिकी राष्ट्रपतिको समर्थनको प्रशंसा गर्नु भएको थियो । नेतन्याहूले आफ्ना नागरिकको सुरक्षाको प्रत्याभूति हुने अवस्था सिर्जना नहुँदासम्म सैनिक कारबाहीलाई निरन्तरता दिने प्रतिबद्धता व्यक्त गर्नु भएको थियो ।
अमेरिकी राष्ट्रपति बाइडेनले प्रधानमन्त्री नेतन्याहूलाई फोन गरी युद्धविराम गर्ने गरी आफ्ना आक्रामक कारबाही स्थगन गर्न आग्रह गर्नुभएको थियो । तर पहिलो पटक फोन गर्दा बाइडेनले इजरायलमाथि दबाब दिनुभएको थिएन । तर मानवीय र भौतिक क्षति बढ्दै गएपछि बाइडेन प्रशासनमाथि दबाब बढ्न थालेको छ ।
इजिप्टका मध्यस्थकर्ताले पनि युद्ध रोक्नेतर्फ कार्य गरिरहेका छन् । उनीहरूले इजरायलको जवाफको प्रतिक्षा गरिरहेको बताएका छन् ।
हमासका एक जना वरिष्ठ अधिकारी मौसा अबु मार्जोकले लेबनानी टेलिभिजनसँग कुरा गर्दै एक दुई दिनभित्रै युद्धविराम हुने अपेक्षा गरिएको बताउनुभएको छ ।
जर्मनीका विदेशमन्त्री हेको मास पनि इजरायली र प्यालेस्टिनीसँग वार्ता गर्न बिहीबार त्यसतर्फ प्रस्थान गर्दै हुनुहुन्छ । इजरायलको विदेश मन्त्रालयले इजरायलको कारबाहीप्रति समर्थन जनाउन स्लोभाकिया र चेक गणतन्त्रका विदेश मन्त्रीहरूले इजरायल भ्रमण गर्न लागेको जनाएको छ ।
इजरायल र हमासबिचको पछिल्लो युद्ध गत मे १० तारिखदेखि सुरु भएको हो । पूर्वी जेरुसेलमस्थित अल अक्सा मस्जिद परिसरमा प्यालेस्टिनी प्रदर्शनकारी र इजरायली प्रहरीबिच निकै दिनदेखि जारी भिडन्तपश्चात हमास लडाकुले जेरुसेलमलाई लक्षित गरी लामो दुरीका क्षेप्यास्त्र प्रहार गरेपछि इजरायलले हमास विरुद्ध कारबाही थालेको थियो ।
अलअक्सा मस्जिद परिसरमा प्रहरीको दमनका साथै यहुदीले दर्जनौँ प्यालेस्टिनी परिवारलाई विस्थापित गर्न खोजेपछि परिस्थिति अझ जटिल बनेको थियो । त्यसयता, इजरायलले सयौँ हवाइ हमला गरिसकेको छ । इजरायलको भनाइमा यी आक्रमण हमासका सबै किसिमका पूर्वाधार ध्वस्त बनाउन केन्द्रित रहेको छ । हमासले पनि चार हजारभन्दा बढी क्षेप्यास्त्र इजरायलतर्फ प्रहार गरेको जनाएको छ ।
गाजाको स्वास्थ्य मन्त्रालयका अनुसार इजरायली आक्रमणबाट कम्तीमा २२७ जनाको मृत्यु भएको छ, जसमा ६४ जना बालबालिका र ३८ जना महिला छन् । आक्रमणबाट एक हजार ६२० जनाभन्दा बढी घाइते भएका छन् । हमास र इस्लामिक जिहादले आफ्ना कम्तीमा २० जना लडाकु मारिएको जनाएका छन् तर इजरायलले १३० जना हमास लडाकु मारिएको दाबी गरेको छ ।
इजरायली आक्रमणको त्रासका कारण झण्डै ५८ हजार प्यालेस्टिनी विस्थापित भएका छन् । इजरायलतर्फ पाँच वर्षका एक बालक सहित १२ जनाको मृत्यु भएको छ ।
इजरायली आक्रमणबाट कम्तीमा १८ वटा अस्पताल र क्लिनिकमा क्षति पुगेको छ भने एउटा स्वास्थ्य संस्था क्षतिग्रस्त भएको विश्व स्वास्थ्य सङ्गठनले जनाएको छ ।
सन् २०१४ यताको सबैभन्दा डरलाग्दो हमला मानिएको यस पटकको युद्धलाई लिएर विश्वका विभिन्न स्थानमा इजरायल विरुद्ध प्रदर्शनहरू भएका छन् ।
संयुक्त राष्ट्रसङ्घद्धारा गाजामा युद्धविराम गर्न आग्रह
यता, संयुक्त राष्ट्रसङ्घीय बालबालिकासम्बन्धी कोष युनिसेफले मध्यपूर्वमा युद्धविराम गरेर त्यहाँका बालबालिकाको सुरक्षा गर्न आग्रह गरेको छ । मध्यपूर्वमा जारी रहेको हिंसाका क्रममा त्यहाँका लाखौँ बालबालिका असुरिक्षत भएका र उनीहरूको अवस्था नाजुक भएको भन्दै सो आग्रह गरेको हो ।
सयुक्त राष्ट्रसङ्घीय बालबालिकासम्बन्धी कोष युनिसेफका प्रमुखले सो आग्रह गर्नुभएको हो । गाजामा जारी रहेको हिंसाले अवस्था दिन प्रतिदिन गम्भीर भएको उहाँले बताउनुभएको छ । त्यसैले सो क्षेत्रमा युद्धविराम गर्न र शान्तिपूर्ण रूपमा यहाँको समस्याको समाधान खोज्नका लागि उहाँले आग्रह गर्नुभएको समाचारमा जनाइएको छ ।
सयुक्त राष्ट्रसङ्घीय बालबालिका सम्बन्धी कोषका कार्यकारी निर्देशक हानरिता फोरले यो हिंसाले यहाँका परिवारहरू मारिएका र घरबारबिहीन भएका जसका कारण यहाँका नागरिकमा परेको समस्याको असर बालबालिकामा परेको बताउनुभएको छ ।
युद्धग्रसत रहेको क्षेत्र गाजाबाट कम्तीमा पनि ३० हजार जना बालबालिका विस्थापित भएको बताइएको छ । प्यालेस्टाइनीहरूको अधिनमा रहेको सो क्षेत्रका ठुलो सङ्ख्याका बालबालिका समस्यामा परेको सो कोषको भनाइ छ ।
साथै गाजा क्षेत्रमा बढ्दो हिंसाका कारण यहाँका कम्तीमा दश लाख बालबालिकामा प्रत्यक्ष तथा अप्रत्यक्ष रूपमा युद्धको असर परिरहेको पनि उहाँले बताउनुभएको छ ।सो क्षेत्रमा बालबालिकासहित सबै नागरिकका लागि आवश्यक मानवीय सहायता पनि पुग्न नसकेको सयुक्त राष्ट्रसङ्घीय सो निकायले बताएको छ ।
