काठमाडौँ । कवि, उपन्यासकार एवम् चलचित्रकर्मी चेतन कार्कीको आइतबार बिहान निधन भएको छ ।
स्वास्थ्यमा समस्या भएर चार दिनअघि छाउनीस्थित सैनिक अस्पतालमा भर्ना हुनुभएका कार्कीको ८४ वर्षका उमेरमा मृत्यु भएको हो ।
साहित्यकार मुरारी सिग्देलका अनुसार केही दिनअघि उहाँलाई गाह्रो भएर कोरोना परीक्षण गराउँदा नतिजा पोजेटिभ आएको थियो तर चार दिनअघि उहाँको मुटुमा समस्या भएर अस्पताल लाँदा आज निधन भएको हो ।
१९९५ कात्तिक २२ गते स्याङ्जा आरुखर्कमा जन्मनुभएका कार्कीले नेपाली, हिन्दी तथा अङ्ग्रेजी र उर्दू भाषामा थुप्रै कृति प्रकाशन गर्नुभएको बताइएको छ । उहाँका “आत्मा बेचेको छैन”, “हनिमुन” “ढलेको गिलास” र “कल्पना टूट चुकी है” लगायत उपन्यास, “जुन निदाउन थाल्यो” र “मायाप्रीतिको चोखो कथा” गीतसङ्ग्र्रह, “हत्केलाले सधैँ सूर्य छेकिँदैन”, मुक्तक सङ्ग्र्रह, “हो देश मेरो पनि” गजल सङ्ग्र्रहलगायत कृति प्रकाशित छन् ।
कार्कीले “विश्वास”, “भुमरी”, “पहिलो प्रेम” चलचित्र निर्देशन गर्नुभएको थियो । कार्कीका चर्चित गीतमा “तिजको रहर आयो बरी लै”, “कान्छी हे कान्छी”, “बोलाऊँ भने लेक स्वर पुग्दैन, बोलाइरहनुहुँदैन”, “बुझ्नै सकिनौ आँखाको भाका मेरो”, “बहिनीको दया छ भने रोधीघर दाइ नाच्यो नभन” आदि छन् ।
