गाजासिटी । इजरायलले शनिबार बिहानै प्यालेस्टिनीको बसोबास रहेको गाजामा गरेको हवाइ आक्रमणमा कम्तीमा १० जनाको मृत्यु भएको छ । मारिएकाहरूमा अधिकांश बालबालिका छन् ।
गाजामा सक्रिय हमासका लडाकुलाई लक्षित गरी इजरायलले यसै साताको सुरुदेखि हवाइ तथा स्थल आक्रमण जारी राखेको छ । गाजामा इजरायल र हमास लडाकुबिचको युद्ध रोक्न र युद्धबिराम गराउन प्रयास जारी छन् ।
पछिल्लो पटकको हिंसा जेरुसेलमबाट सुरु भएको थियो र यो अहिले गाजा क्षेत्रका साथै इजरायली भूमिमा बसोबास गर्ने अरब समुदायसम्म फैलिएको छ । अरब र यहुदी समुदायबिच पनि इजरायलभित्रै हिंसात्मक झडप जारी छन् ।
शुक्रबार इजरायल अधिनस्थ पश्चिमी किनारामा पनि प्यालेस्टिनी समुदायले इजरायल विरोधी प्रदर्शन गरेका थिए । त्यहाँ पनि इजरायली सेनाले गरेको कारबाहीमा ११ जना सर्वसाधारणको गोली लागेर मृत्यु भएको थियो ।
हिंसात्मक कारबाही तिब्र भएसँगै नयाँ प्यालेस्टिनी “इन्तिफादा” अर्थात विद्रोह हुने सम्भावना बढाएको छ । केही वर्षदेखि प्यालेस्टिनी समस्याको समाधानका लागि ठोस पहल र शान्तिवार्ता हुन सकेका छैनन् ।
सन् १९४८ मा इजरायल स्थापना हुने क्रममा झन्डै सात लाख प्यालेस्टिनी विस्थापित भएको दिनको सम्झना पनि यही शनिबार परेको छ । यसदिन अझ बढी हिंसा हुने सम्भावना छ ।
तनाव मत्थर पार्ने प्रयासस्वरुप अमेरिकी कूटनीतिज्ञ हाडी अम्र ह्वाइट हाउसको प्रतिनिधित्व गर्दै शुक्रबार नै इजरायल आइपुग्नुभएको छ । इजरायल–प्यालेस्टिनका विषयमा छलफल गर्न राष्ट्रसंघीय सुरक्षा परिषदको बैठक आइतबार बस्दै छ ।
यसैबिच, इजिप्टको एक वर्षसम्म शान्ति कायम राख्ने प्रस्तावलाई हमासले स्वीकार गरे पनि इजरायलले अस्वीकार गरेको छ ।
सोमबार रातिदेखि यता हमासले इजरायली भूमितर्फ सयौँ क्षेप्यास्त्र प्रहार गरेको छ । बदलामा इजरायलले गाजापट्टीमा गरेको भिषण सैन्य कारबाहीमा कम्तीमा १२६ जनाको मृत्यु भइसकेको छ जसमा ३१ जना बालबालिका र २० जना महिला रहेका छन् ।
उता, इजरायलतर्फ भने ६ वर्षीय एक बालक र एक सैनिकसमेत सात जनाको ज्यान गएको छ ।
गाजाबाट इजरायलतर्फ क्षेप्यास्त्र प्रहार र इजरायली हवाइ हमला शनिबार बिहानैदेखि जारी छ । एउटा हवाइ हमलामा गाजाको एक तीनतले घर भत्किएको र त्यहाँ रहेका आठ बालबालिका र दुई महिलाको मृत्यु भएको रेडक्रसले जनाएको छ ।
मोहम्मद अबु हताबले संवाददाताहरूलाई भन्नुभयो– इद मनाउन आफन्तकोमा गएकी पत्नी र छ देखि १४ वर्ष उमेरका तीन बालबच्चाको मृत्यु भयो । ११ वर्षको एउटा बच्चा हराइरहेको छ । एउटा पाँच महिनाको छोरा ओमार मात्र बाँचेको छ ।
इजरायली सेनाका प्रवक्ता लेफ्टिनेन्ट कर्णेल जोनाथन कोनरिकसले हमास लक्षित आक्रमण गर्दा ठुलो क्षति नहोस् भनेर इजरायली सेनाले सचेतता अपनाएको दाबी गर्नुभएको छ । तर सेनाले हवाइ कारबाही गर्नुअघि सर्वसाधारणलाई आफ्ना स्थान छाड्ने सङ्केत गर्दै साइरन नबजाइएको स्थानीयको भनाइ छ ।
हमास र इस्लामिक जिहाद समूहले आफ्ना २० जना लडाकु मारिएको बताएको छ । तर इजरायली सेनाले त्योभन्दा ठुलो सङ्ख्यामा लडाकु मारिएको दाबी गरेको छ । (रासस/एपी)
