काठमाडौं । राष्ट्रिय जनमोर्चाले गण्डकी प्रदेश सभामा कृष्णचन्द्र पोखरेललाई मतदान गर्न ह्वीप जारी गरेको छ । राजमो प्रदेश सभाका सचेतक पियारी थापाको तर्फबाट जारी ह्वीपमा मुख्यमन्त्रीका उम्मेदवार पोखरेलको पक्षमा अनिवार्य हस्ताक्षर गर्न निर्देशन दिइएको छ ।
गण्डकीमा राजमोका तीन सांसद छन् ।
सो ह्वीपमा भनिएको छ, ‘गण्डकी प्रदेश प्रमुखले २०७८ वैशाख २६ गते संविधानको धारा १६८ को उपधारा (२) अनुसार वैशाख २६ गतेदेखि तीन दिनभित्र बहुमत सदस्य समर्थन प्राप्त सदस्यलाई सरकार गठनका लागि समय सीमा तोकिएको हुनाले गण्डकी प्रदेश सभा प्रतिनिधित्व गर्ने पार्टीहरु नेपाली कांग्रेस नेकपा (माओवादी केन्द्र), राष्ट्रिय जनमोर्चा र समाजवादी पार्टीका ३१ जना प्रदेश सभा सदस्यहरूको मुख्यमन्त्री पदका लागि माननीय कृष्णचन्द्र नेपाली पोखरेललाई मुख्यमन्त्रीमा नियुक्त गर्नको लागि समर्थन रहेको हुँदा तत परियोजनाका लागि प्रदेश प्रमुख समक्ष सरकार गठन प्रस्तुत गर्ने दाबी पत्रमा अनिवार्य रूपमा हाम्रो संसदीय दलका सदस्यहरुले हस्ताक्षर गर्न निर्देशन (ह्वीप) जारी गरिएको छ ।’
यसअघि राष्ट्रिय जनमोर्चा पार्टीले गण्डकी प्रदेश सरकारलाई दिएको समर्थन फिर्ता लिने निर्णय गरेको थियो । वैशाख १ मा राजमो केन्द्र र वैशाख १२ मा गण्डकी संसदीय दलको बैठकले पृथ्वीसुब्बा गुरुङलाई दिएको विश्वासको मत फिर्ता गरेको थियो ।
सोमबार प्रदेशसभा सचिवालयमा सरकारलाई दिएको समर्थन फिर्ता लिएको पत्र बुझाएको छ । गण्डकीका मुख्यमन्त्री पृथ्वीसुब्बा गुरुङले आइतबार नै राजीनामा दिनुभएको थियो । गुरुङ विरुद्ध दर्ता भएको अविश्वासको प्रस्तावमाथी आज मतदान हुने कार्यक्रम थियो । अब तीन दिनभित्र गण्डकीमा नयाँ सरकार गठनको प्रक्रिया अघि बढ्ने जनाइएको छ ।
