काठमाडौं । राष्ट्रिय जनमोर्चाका सांसद दुर्गा पौडेलले राजमोले प्रधानमन्त्री केपी ओलीलाई विश्वासको मत नदिने स्पष्ट पार्नुभएको छ । सोमबार युगदर्शनसँग कुरा गर्दै राजमो उपाध्यक्ष एवम् प्रवक्तासमेत रहेकी सांसद पौडेलले ओलीको विपक्षमा मतदान गर्ने बताउनुभयो ।
प्रधानमन्त्री ओलीले आज (वैशाख २७) गते संसदबाट विश्वासको मत लिने कार्यक्रम छ । संसदमा हुने छलफलपछि सम्भवतः आजै वा एक/दुई दिनमा मतदान हुनेछ ।
राष्ट्रिय जनमोर्चाले प्रधानमन्त्री ओलीले संसद विघटन गरेर असंवैधानिक कदम चालेको भन्दै गत पुस महिनामै सरकारलाई दिएको समर्थन फिर्ता लिइसकेको छ । सांसद पौडेलले ओलीका कारण संविधान कार्यान्वयनमा समस्या देखिएको, प्रतिगामी शक्तिहरु सलबलाउने मौका पाएको, राष्ट्रियतामाथि आँच पुगेको, भ्रष्टाचारजन्य गतिविधि बढेको तथा जनतालाई शुसासन दिन नसकेको लगायतका कारणले उनलाई हटाउनुपर्ने आवश्यक रहेको बताउनुभयो ।
प्रधानमन्त्रीले विश्वासको मत लिने प्रयोजनका लागि आज दिउँसो १ बजे प्रतिनिधि सभाको बैठक बस्दैछ । प्रधानमन्त्री ओलीविरुद्ध प्रतिपक्षी नेपाली कांग्रेस, नेकपा (माओवादी केन्द्र) र राष्ट्रिय जनमोर्चाले विश्वासको मत नदिने निर्णय गरिसकेका छन् भने जसपाले सांसदहरुलाई कुनै ह्वीप नलगाउने निर्णय गरेको छ ।
एमालेको माधव नेपाल समूहले सामुहिक राजीनामा दिने तर विश्वासको पक्षमा मतदान नगर्ने बताएको छ ।
प्रधानमन्त्री ओलीले आजै राजीनामा दिने र संसदमा सबैभन्दा ठूलो दलको हैसियतले पुनः प्रधानमन्त्री नियुक्तिका लागि दाबी प्रस्तुत गर्नेसमेत राजनीतिक वृतमा चर्चा चलेको छ ।
