याङ्गुन । म्यानमारको सेनाले युद्धविरामको समयावधि एक महिना थप गरेको छ ।
आगामी मे ३१ सम्म सेनाबाट हुने कारबाहीसम्बन्धी कुनै पनि क्रियाकलाप नहुने सेनाले शुक्रबार जानकारी दिएको हो ।
प्रधान सेनापतिको कार्यालयद्वारा जारी वक्तव्यमा वर्तमान विशेष परिस्थितिलाई मध्यनजर गर्दै युद्धविरामको समयावधि लम्ब्याइएको उल्लेख गरिएको छ ।
सेनाले कारबाहीसम्बन्धी कामहरू नगरे पनि आन्तरिक तथा प्रशासनिक र नियमित कामहरू भने गरिरहने पनि वक्तव्यमा जनाइएको छ ।
म्यानमारको सेनाले गत फेब्रुअरी १, २०२१ मा सत्ता हातमा लिएर शासन गर्न थालेको छ भने नेताहरूलाई बन्दी बनाइएको छ ।
सेनाले सत्ता नियन्त्रणमा लिएको विरोधमा आन्दोलन भइरहेको छ । आन्दोलनका क्रममा सयौँको मृत्यु भइसकेको छ भने हजारौँ घाइते भएका छन् ।
सेनाले लोकतान्त्रिक सरकारलाई अपदस्त गरेको भन्दै संयुक्त राष्ट्र सङ्घलगायतका अन्तर्राष्ट्रिय निकाय र विश्वका धेरै देशहरूले विरोध पनि जनाएका छन् । उनीहरूले लोकतान्त्रिक प्रक्रियाबाट बनेको सरकारलाई नै सत्ताको जिम्मेवारी दिन म्यानमारको सेनालाई सुझाव र दबाब पनि दिएका छन् ।
तर सेनाले भने गत निर्वाचनमा धाँधली भएकाले फेरि अर्को निर्वाचन गराउने भन्दै एक वर्षका लागि सत्ता हातमा लिएको स्पष्ट पारेको छ । (रासस(सिन्ह्वा)
