काठमाडौँ । राष्ट्रिय जनमोर्चा गण्डकी प्रदेशका सांसद खिमविक्रम शाहीले आफू पार्टीको निर्णयप्रति प्रतिबद्ध रहेको बताउनुभएको छ । पोखराको चरक अस्पतामा उपचाररत सांसद शाहीले बिहीबार अस्पतालबाटै विज्ञप्ति प्रकाशित गरी आफू स्वस्थ्य भएपछि थप स्पष्ट पार्ने बताउनुभएको छ ।
बुधबार प्रदेश सभामा मुख्यमन्त्री पृथ्वीसुब्बा गुरुङविरुद्ध अविस्वासको प्रस्तावमाथि मतदान गर्ने कार्यक्रम हुँदा सम्पर्कविहीन भएका सांसद शाही पछि चरक अस्पतालको आईसीयू कक्षमा रहेको खबर सार्वजनिक भएको थियो ।
उहाँले आफू अचानक बिरामी परेको र बेहोस भएको स्पष्टोक्ति दिनुभएको छ । उहाँले सञ्चारमाध्यम र सामाजिक सञ्जालका भ्रामक खबरबाट धारणा नबनाउन पनि आग्रह गर्नुभएको छ ।
विज्ञप्तिमा भनिएको छ– “म खिमविक्रम शाही राष्ट्रिय जनमोर्चाको तर्फबाट गण्डकी प्रदेश, बागलुङ जिल्ला प्रतिनिधि सभा निर्वाचन क्षेत्र नं. २, प्रदेशसभा निर्वाचन क्षेत्र नं. ख बाट निर्वाचित प्रदेशसभाको सदस्य हो । मिति २०७८ वैशाख १५ गते सदनको कार्यसूचीबमोजिम मुख्यमन्त्रीमाथिको अविश्वासको प्रस्तावमाथि छलफल र मतदान हुने रहेको थियो । तर म सदनमा जाने भनी तयारी अवस्थामा रहेको बेला अचानक बिरामी भई मेरो आफ्नै भाइलाई सम्पर्क गरेर आफ्नो स्वास्थ्योपचारका लागि अस्पताल लैजाने क्रममा म बेहोस भएछु । म अहिले उपचाररत छु । हाल मेरो स्वास्थ्यमा क्रमिक सुधार आएको महसुस गरेको छ । म थप स्वस्थ भएपछि मेरोबारेमा उठेका कैयौँ प्रश्नको बारेमा स्पष्ट गर्ने नै छु ।
अहिले समाचार र सामाजिक सञ्जालमा प्रचार भएका विभिन्न भ्रामक खबरबाट आफ्नो धारणा बनाएर विचार प्रकट नगरिदिनु हुन म सम्पूर्ण दाजुभाइ, दिदीबहिनी र मेरा शुभचिन्तकमा प्रष्ट पार्न चाहन्छु । साथै पार्टीको निर्णय र संसदीय दलको बैठकमा गरिएको निर्णयमा मेरो पनि सहभाभागिता रहेका कारण ती निर्णयप्रति मेरो पनि सहमति रहेकाले त्यस विषयमा पार्टीनिर्णयप्रति प्रतिबद्धता कायमै छ ।
मेरो स्वास्थ्यप्रति गम्भीर भई उपचारमा सहयोग गर्नुहुने स्वास्थ्यकर्मी, स्वास्थ्यप्रति चासो र चिन्ता प्रकट गर्नुहुने मेरा पार्टीका नेता, प्रदेशसभाका माननीयज्यू, अग्रज साथी र सम्पूर्ण शुभचिन्तकमा धन्यवाद प्रकट गर्दछु ।”
