काठमाडौं । जनता समाजवादी पार्टीका संघीय परिषद अध्यक्ष डा. बाबुराम भट्टराईले प्रधानमन्त्री केपी ओलीले बोलाएको सर्वदलीय बैठकमा पार्टीलाई आधिकारिक खबर नआएको दाबी गर्नुभएको छ ।
आफ्नै पार्टीका अध्यक्ष महन्थ ठाकुर, नेताहरु लक्ष्मणलाल कर्ण र सर्वेन्द्र शुक्ल उपस्थित भएको बैठकप्रति कटाक्ष गर्दै डा. भट्टराईले ‘चेइ नभनी कुकुर पनि कसैको घर जाँदैन’ भन्नुभएको छ ।
आइतबार ट्वीट गर्दै डा. भट्टराईले भन्नुभएको छ, ‘चेइ नभनी कुकुर पनि कसैको घर जॉदैन रे ! मिडियाबाट सुनिएको कथित सर्बदलीय बैठकमा प्रमनिवासको मिठोमसिनो उदरस्थ गर्न पाइएला भनेर त्यत्तिकै हाम्फालेर जाने कुरा भएन । जसपाको आधिकारिक केन्द्रीय कार्यालय बालकुमरी, ललितपुरमा सोध्दा कुनै जानकारी थिएन । पछि मिडियाबाटै सुनियो एमसीसी बैठक बहिष्कार पो भएछ !’
चेइ नभनी कुकुर पनि कसैको घर जाॅदैन रे!मिडियाबाट सुनिएको कथित सर्बदलीय बैठकमा प्रमनिवासको मिठोमसिनो उदरस्थ गर्न पाइएला भनेर त्यत्तिकै हाम्फालेर जाने कुरा भएन।जसपाको आधिकारिक केन्द्रीय कार्यालय बालकुमरी,ल.पु.मा सोध्दा कुनै जानकारी थिएन।पछि मिडियाबाटै सुनियो-MCCबैठक बहिष्कार पो भएछ!
— Baburam Bhattarai (@brb1954) April 18, 2021
शनिबार भएको सर्वदलीय बैठकमा प्रधानमन्त्रीले कोरोना नियन्त्रण, उपनिर्वाचन र एमसीसी पारित गर्ने सन्दर्भमा छलफल गर्नुभएको थियो । प्रधानमन्त्रीको एमसीसी पारित गर्ने एजेन्डालाई कांग्रेस र जसपाका नेताहरुले सहमति दिएका थिए भने राष्ट्रिय जनमोर्चाले आपत्ति जनाएको थियो ।
अहिले प्रधानमन्त्री ओलीलाई साथ दिने विषयमा जसपाभित्र तीब्र ध्रुविकरण देखिएको छ । महन्थ ठाकुर र राजेन्द्र महतोलगायत नेताहरु ओलीको पक्षमा छन् भने डा. भट्टराई र उपेन्द्र यादवलगात नेताहरु ओलीविरुद्ध खनिएका छन् ।
यो पनि : सर्वदलीय बैठक : एमसीसीका पक्षमा एमाले, कांग्रेस र जसपाको ‘गठबन्धन’, पास गर्नै नहुने राजमोको अडान
