काठमाडौं । गृहमन्त्री रामबहादुर थापाको सांसद पद खारेज भएको छ । राष्ट्रिय सभा सदस्य रहेका थापा नेकपा (एमाले) मा प्रवेश गरेका कारण नेकपा माओवादी केन्द्रले कारबाही गरेपछि सांसद पद खारेज भएको हो ।
माओवादी केन्द्रले दर्ता गराएको सूचनाअनुसार आइतबार संघीय संसदले उहाँको सांसद पद खारेज भएको जानकारी गराएको छ । योसँगै उहाँको मन्त्री पद पनि गएको छ ।
यसअघि माओवादी केन्द्रले पार्टी परित्याग गरी नेकपा (एमाले) ओली समूहमा रहेका चार जना मन्त्रीहरु टोपबहादुर रायमाझी, लेखराज भट्ट, प्रभु शाह र गौरीशंकर चौधरीलाई पनि सांसद पदबाट हटाएको थियो । उनीहरु सबैलाई प्रधानमन्त्री केपी ओलीले मन्त्री पदमा पुनर्नियुक्ति दिनुभएको छ । सांसद नरहेपनि ६ महिनासम्म मन्त्री बन्न पाउने संवैधानिक व्यवस्था छ ।
कर्णालीमा फ्लोर क्रस गर्नेलाई मन्त्रीपद उपहार
यता, कर्णाली प्रदेशमा नेकपा (एमाले)को ह्विप नमानेर मुख्यमन्त्री महेन्द्रबहादुर शाहीलाई विश्वासको मत दिएपछि मन्त्री पद उपहार पाएका ३ जनाले आज शपथ ग्रहण गर्ने भएका छन् ।
आफ्ना पक्षमा मतदान गरेर पद र सरकार जोगाइदिएको भोलिपल्टै शनिबार माओवादी केन्द्रबाट मुख्यमन्त्री शाहीले नन्दसिंह बुढालाई भूमि व्यवस्था, कृषि तथा सहकारी, अमरबहादुर थापालाई भौतिक पूर्वाधार विकास र कुर्मराज शाहीलाई उद्योग, पर्यटन, वन तथा वातावरण मन्त्री बनाउनुभएको थियो ।
मुख्यमन्त्री शाहीले मागेको विश्वासको मतका लागि सांसदहरु बुढा, थापा र शाहीसहित प्रकाश ज्वालाले एमालेको ह्विप उल्लंघन गर्दै शाहीको पक्षमा मतदान गरेका थिए । चारै सांसदलाई एमाले प्रदेश कमिटीले साधारण सदस्यसमेत नरहने गरी कारबाही गर्न पार्टी केन्द्रलाई सिफारिस गरेको छ ।
