बुटवल । राष्ट्रिय जनमोर्चाका अध्यक्ष चित्रबहादुर केसीले प्रधानमनत्री केपी ओलीलाई बोक्नेहरुलाई काँध थाप्न नसकिने बताउनुभएको छ । गण्डकी प्रदेश सरकारलाई आफ्नो पार्टीले दिएको समर्थन फिर्ता लिएको चर्चा गर्दै केसीले ओलीलाई बोक्नेहरुलाई आफूहरुले समर्थन दिन नसक्ने स्पष्ट पार्नुभएको हो ।
शुक्रबार बुटवलमा अखिल नेपाल जनजाति सम्मेलन लुम्बिनी प्रदेश समिति र जातीय समता समाज लुम्बिनी प्रदेश समितिको ३४औँ संयुक्त स्थापना दिवस कार्यक्रममा अध्यक्ष केसीले ओलीको कदम एक पछि अर्को झन् झन् गणतन्त्र विरोधी, राष्ट्रको हित विपरीत, तानाशाही र स्वेच्छाचारी हुन थालेको बताउनुभयो ।
आफ्नै काँध गन्हाएपछि अब ओलीलाई अगाडि बोकेर जान नसकिने उहाँको भनाई थियो । वामपन्थी एकता छाडेर नेका समेतको गठबन्धन तिर लागेको आरोप लगाउने हरूले ओली सरकारले मात्र हैन उनका मुख्यमन्त्रीहरूले पनि ओलीका प्रत्येक गलत कदमलाई साथ दिएको र कहिल्यै पनि राष्ट्रियता र गणतन्त्रको रक्षा तथा भ्रष्टाचार रोक्न राम्रो सल्लाह दिनुको सट्टा सरकारका सबै कार्यमा सहयात्री बनेको बताउनुभयो ।
अब पनि देश र गणतन्त्र लाई धरापमा राख्नेहरूलाई प्रदेशमा समर्थन गर्न नसकिने उहाँको भनाई थियो । यसको विकल्पमा आउने सरकार सकारात्मक नै हुने छ भन्ने दावा गर्न नसकिए पनि ओलीको प्रत्येक कदम प्रतिगामी दिशामा लक्षित भएको भन्दै देश र जनतालाई दुर्घटनामा लैजाने प्रयत्न रोक्नुको विकल्प नभएको बताउनुभयो ।
जातीय विभेदले सुरूदेखि गाँजेको हाम्रो समाजलाई कम्युनिस्ट बनाउनु धेरै कठिन भएको इतिहास स्मरण गर्दै सुरुबाटै सिकेको ज्ञान कुनै न कुनै रूपमा आज पनि समाजमा निरन्तर काम लागेको छ भनी बताउनुभयो । तर क्षणिक सिकाईबाट नेता बन्ने हरूको महत्वाकांक्षाले कम्युनिस्ट आन्दोलन कमजोर भएको औँल्याउनुभयो ।
‘हाम्रो पार्टी सानो छ भन्नेहरूले अहिले आफ्नो स्वार्थ सिद्धी गर्न प्रदेशहरूमा हाम्रै भर परेको र हाम्रो समर्थनले आफ्ना ठेकेदार, माफिया आदी प्रयोग गरेर स्वार्थसिद्ध गर्न खोज्दैछन्’ केसीले भन्नुभयो, ‘आफूलाई कम्युनिस्ट भन्ने हरूको यो चर्तिकलाले देशको एकता, अखण्डता र सार्वभौमसत्तामा समेत गम्भीर संकट उत्पन्न गराएकोले अब पनि काँध थापेर जान सकिँदैन ।’
बर्तमान गणतन्त्रले जनताका आधारभूत समस्या हल गर्दैन तैपनि यो स्थापना गर्न नेपाली जनताको झण्डै १०० वर्षको संघर्षको परिणाम हो ।राजावादीको साथ साथै ‘वामपन्थी’हरूबाट पनि यो गणतन्त्रमाथि लगातार हमला भैरहेको उहाँले बताउनुभयो ।
‘यो गणतन्त्र केहिपनि होइन भन्नेहरूले हिजो पञ्ञ्चायती ब्यवस्थामा कसरी जनताका आवाज उठाउँदा दुःखदिने, सताउने, मार्ने गरेको सम्झना हुनुपर्छ’ उहाँले भन्नुभयो, ‘आज गणतन्त्रको विरूद्ध बोल्नेहरूले यो ब्यवस्था समाप्त भए कस्तो ब्यवस्था आँउछ? हेक्का राख्न जरुरी छ ।’
आजको युवा पिढी राजनीतिबाट विमुख हुनु समाजको लागि दूर्भाग्य हो भन्दै उहाँले आफूहरु डाँडाको जून जस्तै भएको र अबको आशाको किरण युवाहरू भएकोले जिम्मेवारी बोध गर्दै अगाडि बढ्नुपर्ने बताउनुभयो।
कार्यक्रममा अखिल (छैठौं) का केन्द्रीय सदस्य सरोजमान सिंह, अखिल नेपाल युवक संघका केन्द्रीय सदस्य हरि योगी, अखिल नेपाल उद्योग व्यापार संघका केन्द्रीय अध्यक्ष ढुण्डीराज शर्मा, अखिल नेपाल जनजाति सम्मेलनका केन्द्रीय कार्यवहाक महासचिव उषा पुन, जातीय समता समाजका केन्द्रीय अध्यक्ष राजेश विकले स्थापना दिवसको इतिहास र महत्त्व वारे प्रकाश पार्नु भएको थियोे ।
त्यस्तै, राजमो केन्द्रीय परिषद सदस्य शुरेश थापा, अखिल नेपाल किसान महासंघका केन्द्रीय उपाध्यक्ष चन्द्रबहादुर केसी, राजमोका केन्द्रीय सदस्य ईन्दीरा ज्ञावली, नारायण जिसी, लुम्बिनी प्रदेश कोषाध्यक्ष गणेश गौतम, जातीय समता समाजका पूर्व केन्द्रीय अध्यक्ष दसल बहादुर विक, जनप्रतिनिधि दिल प्रसाद नेपालीको पनि आतिथ्यता रहेको थियोे ।
टिका विकको अध्यक्षता,शेरबहादुर सुर्यवंशीको स्वागत तथा रेशम गुरुङ्गको सञ्चालनमा कार्यक्रम सम्पन्न भएको थियो ।
