काठमाडौं । सरकार र नेत्रविक्रम चन्द ‘विप्लव’ नेतृत्वको नेकपाबीच तीन बुँदे सहमति भएसँगै हिरासतमा रहेका नेकपाका नेताहरुलाई छोड्ने प्रक्रिया सुरु गरिएको छ । सरकारले विप्लवसँग तीन बुँदे सहमति गरेसँगै उनीहरुमाथिको मुद्दा फिर्ता लिएर रिहा गर्न सुरु गरिएको हो ।
बिहीबारको मन्त्रिपरिषद् बैठकले २०७५ फागुन २८ गते लगाएको उक्त पार्टीमाथिको प्रतिबन्ध पनि फकुवा गर्ने निर्णय गरेको थियो भने गृह मन्त्रालयले प्रक्रिया पुरा गरेर रिहा गर्न बिहीबार नै मातहतलाई निर्देशन दिएको थियो ।
यसै क्रममा विप्लवका सचिवालय सदस्य धर्मेन्द्र बास्तोला प्रहरी हिरासतबाट छुट्नुभएको छ । आगजनी तथा संगठित अपराधको मुद्दामा जिल्ला प्रहरी कार्यालय काभ्रेको हिरासतमा रहेका बास्तोलालाई हिरासतमुक्त गरिएको काभ्रेका प्रहरी प्रमुख एसपी भुपेन्द्र खत्रीले बताउनुभयो ।
जिल्ला प्रहरी कार्यालयले अनुसन्धान सकेर शुक्रबार जिल्ला सरकारी वकिल कार्यालयमा फाइल बुझाए पनि सरकारसँग भएको सहमति अनुसार सरकारी वकिल कार्यालयले मुद्दा नचलाउने निर्णय गरेपछि उहाँलाई श्रीमतीको जिम्मामा छाडिएको एसपी खत्रीले जानकारी दिनुभयो ।
दुई वर्षअघि नेकपालाई प्रतिबन्ध लगाएपछि विप्लव समूहका डेढ सय नेता कार्यकर्ता थुनामा छन् । जसमा बास्तोलासहित २ सचिवालय सदस्यलगायत ७ केन्द्रीय नेता थुनामा थिए । सरकार र उक्त पार्टीबीच सहमति भएसँगै उनीहरुलाई जतिसक्दो छिटो छाड्ने तयारी सरकारले गरेको छ ।
विप्लवका केन्द्रीय नेताहरुमध्ये विप्लवका दाइसमेत रहेका उक्त पार्टीका केन्द्रीय सदस्य चन्द्रबहादुर चन्द चितवनका प्रहरी हिरासतमा हुनुहुन्छ भने सचिवालय सदस्य हेमन्तप्रकाश ओली ललितपुरस्थित नक्खु कारागारमा हुनुहुन्छ ।
केन्द्रीय सदस्य माइला लामा संखुवासभामा, भरत बम काठमाडौंस्थित केन्द्रीय कारागारमा, र केन्द्रीय सदस्य ओमप्रकाश पुन कैलालीमा थुनामा हुनुहन्छ ।
सरकार विप्लव नेकपाबीच बिहीबार तीन बुँदे सहमति भएको थियो । सहमतिपछि शुक्रबार दिउँसो २ बजे राष्ट्रिय सभागृहमा विप्लव र प्रधानमन्त्री केपी ओलीले सम्बोधन गर्ने तयारी रहेको छ ।
