काठमाडौं । भारतमा १ करोड ११ लाखभन्दा बढी कोरोना भाइरसबाट संक्रमित भइसकेका छन् । सोमबारसम्ममा १ लाख ५७ हजारभन्दा बढीको मृत्यु भएको छ भने १ करोड ७ लाख ८६ हजारभन्दा बढी निको भइसकेका छन् ।
भारतको केन्द्रीय स्वास्थ्य मन्त्रालयका अनुसार आइतबार मात्र १५ हजार ५ सयभन्दा बढी नयाँ संक्रमित थपिएका छन् । र, थप सय जनाभन्दा बढीको ज्यान गएको छ । नयाँ संक्रमितमध्ये ८७ प्रतिशतभन्दा बढी महाराष्ट्र, केरला, गुजरात, तमिलनाडु, कर्नाटक र पन्जाब राज्यका रहेको भारतीय सञ्चारमाध्यमहरुले जनाएका छन् ।
संक्रमणको सबैभन्दा तीव्र वृद्धि महाराष्ट्रमा देखिएको छ । आइतबार मात्र महाराष्ट्रमा ८ हजार २ सय ९३ संक्रमित थपिएका छन् । योसँगै महाराष्ट्रमा संक्रमितको संख्या २१ लख ५५ हजार नाघेको छ ।
विज्ञहरुले पछिल्लो समय संक्रमितको संख्या बढ्नुलाई संक्रमणको दोस्रो चरणको लहरसमेत हुन सक्ने भन्दै चेतावनीसमेत दिएका छन् । संक्रमितहरुको संख्या बढी भएकाले दिल्ली सरकारले १५ फागुनपछि यी राज्यबाट दिल्ली आउनेहरुलाई पीसीआर रिपोर्ट अनिवार्य गरेको छ ।
यसैबीच भारतीय प्रधानमन्त्री नरेन्द्र मोदीले कोरोना भाइरसविरुद्धको खोप लगाएका छन् । उनले सोमबार बिहानै दिल्लीस्थित अखिल भारतीय आयुर्विज्ञान संस्थान (एम्स्) पुगेर कोरोना भाइरसविरुद्धको खोपको पहिलो मात्रा लिएका हुन् ।
मोदीले खोप लगाएपछि त्यसको जानकारी ट्वीटमार्फत दिएका थिए । ‘एम्स्मा कोभिड १९ विरुद्धको खोपको पहिलो डोज लगाएँ । हाम्रा चिकित्सक र वैज्ञानिकले कोभिड–१९ विरुद्धको वैश्विक लडाइँलाई बलियो बनाउन तीव्र रूपमा गरेको काम उल्लेखनीय छ’ मोदीले लेखेका छन् । साथै उनले भारतलाई कोभिड–१९ मुक्त बनाउन कोरोना खोप लगाउन योग्य सबैलाई खोप अभियानमा सहभागी हुन आह्वानसमेत गरेका छन् ।
भारतका सरकारी केन्द्रमा खोप निस्शुल्क उपलब्ध हुनेछ भने निजी अस्पतालहरूमा शुल्क लाग्ने व्यवस्था गरिएको छ । निजी अस्पतालमा उपलब्ध खोपको एक डोजका लागि भारु २५० शुल्क तोकिएको छ ।
भारत सरकारले यसको वर्षको बजेटमा खोप अभियानकै लागि भनेर ३ खर्ब ५० अर्ब भारु भन्दा बढी विनियोजन गरेको छ । आगामी जुलाई महिनासम्म २७ करोडलाई खोप लगाउने लक्ष्य राखिएको छ ।
