काठमाडौँ । विघटित प्रतिनिधि सभाको पुनःस्थापना भएपछि प्रतिनिधि सभाको सातौँ अधिवेशनमा विघटनअघि प्रक्रियामा ३२ विधेयक प्रस्तुत हुने भएका छन् ।
तीमध्ये दर्ता भएर वितरण गरिएका आठ, समितिमा विचाराधीन १०, सभामा विचाराधीन १२ र राष्ट्रियसभाबाट प्राप्त सन्देश पेस हुन बाँकी दुई विधेयक रहेको सचिवालयका सूचना अधिकारी दशरथ धमलाले जानकारी दिए ।
२०७४ सालको निर्वाचनपछि अहिले हुन लागेको सङ्घीय संसदको यो सातौँ अधिवेशन हो ।
यसअघि सङ्घीय संसदको पहिलो अधिवेशन २०७४ फागुन २१ गतेदेखि चैत २० गतेसम्म भएको थियो । संसद्को दोस्रो अधिवेशन २०७५ वैशाख २३ गतेदेखि असोज ११ गतेसम्म, तेस्रो अधिवेशन २०७५ पुस ११ गतेदेखि चैत १० गतेसम्म, चौथो अधिवेशन २०७६ वैशाख १६ गतेदेखि असोज २ गतेसम्म भएको थियो ।
त्यस्तै संसदको पाँचौँ अधिवेशन २०७६ पुस ४ गतेदेखि चैत २४ गतेसम्म र छैटौँ अधिवेशन २०७७ वैशाख २६ गतेदेखि असार १८ गतेसम्म चलेको थियो ।
