काठमाडौं । नेकपा प्रचण्ड–नेपाल समूहका नेता रघुजी पन्तले राष्ट्रिय सभा सदस्य कोमल वलीलाई ‘पिँडुला देखाएको भरमा प्रधानमन्त्री केपी शर्मा ओलीले सांसद बनाएको’ भनेकामा वरिष्ठ पत्रकार भुषण दाहालले गम्भीर आपत्ति जनाउनुभएको छ ।
पन्तले यस्तो बोलिरहेको भिडिओ अहिले सामाजिक सञ्जालमा भाइरल बनिरहेको छ । जसमा स्वयम् सांसद वलीसहित अन्य पनि धेरैले आलोचना गरिरहेका छन् ।
वरिष्ठ पत्रकार भुषण दाहालले पन्तको नाम नलिइकन ट्वीट गर्नुभएको छ, ‘पत्रकारिताबाट राजनीति हुँदै नागरिक (अगुवा) बन्न पुगेका बाबुजीको यो यात्रामा मस्तिष्क र थुतुनोको चिकित्सकिय जाँच भयो भएन होला ? कस्तो सडकछाप (सार्वजनिक) विचार । यिनका लालनपालन कर्तालाई पनि त अलि समुन्द्र पारीको भाषामा भनिने ‘इम्बारस्मेन्ट’ त भएकै होला ।’
पत्रकारिता बाट राजनीति हुँदै नागरिक (अगुवा) बन्न पुगेका बाबुजीको यो यात्रामा मस्तिष्क र थुतुनोको चिकित्सकिय जाँच भयो भएन होला? कस्तो सडकछाप (सार्वजनिक) बिचार । यिनका लालनपालन कर्तालाई पनि त अलि समुन्द्र परीको भाषामा भनिने इम्बारस्मेन्ट त भएकै होला।
— bHUSANdAHAL (@DahalTbd) February 28, 2021
यस्तै, राष्ट्रिय सभा सदस्य कोमल वलीले पनि पन्तको भनाईप्रति गम्भीर आपत्ति जनाउनुभएको छ । आफूविरुद्ध प्रयोग गरेका शब्दले महिलाको अपमान गरेको भन्दै गायिकासमेत रहेकी वलीले सामाजिक सञ्जालमार्फत विरोध गर्नुभएको हो ।
एक कार्यक्रममा नेता पन्तले वर्षौंदेखि संघर्ष गरेका, पार्टीकै लागि जीवन अर्पण गरेर गाला चाउरी पारेका महिलाले चाहिँ कुनै अवसर नपाएको तर पिडुँला देखाउँदै पोइल जान पाम भन्नेलाई चाहिँ प्रधानमन्त्री ओलीले पार्टीको केन्द्रीय सदस्य, सांसद र राष्ट्रिय सभा सदस्य बनाएको टिप्पणी गर्नुभएको थियो ।
