श्यामलाल पोखरेल/बुटवल ।।
नेपाल कम्युनिस्ट पार्टी (मसाल) का महामन्त्री मोहनविक्रम सिंहले सर्वोच्च अदालतको फैसलाले संविधानलाई बलियो र विश्वासिलो बनाएको बताउनुभएको छ ।
संसद पुनःस्थापना गर्ने सर्वोच्च अदालतको फैसलाप्रति धन्यवाद दिँदै संसद पुनःस्थापनापछि देशमा नयाँ परिस्थिति पैदा भएको बताउनुभयो ।
संसद पुनःस्थापना भए पनि देशमा अस्थिरता पैदा हुने खतरा रहेको उल्लेख गर्दै उहाँले त्यसबाट भारतीय र अमेरिकी साम्राज्यवादी शक्तिले फाइदा उठाउने सम्भावना रहेको बताउनुभयो । यो अवस्थाका लागि मुख्य रूपमा ओली नै जिम्मेवार रहेको उहाँको भनाइ थियो ।
प्रगतिशील पत्रकार सङ्घ रुपन्देहीले फागुन १३ गते बिहीबार बुटवलमा आयोजना गरेको पत्रकार भेटघाट कार्यक्रममा बोल्दै महामन्त्री सिंहले राजावादी, भारतीय र अमेरिकी साम्राज्यवादी शक्तिको सक्रियताले नयँं प्रकारको जटिलता आउन सक्ने बताउनुभयो ।
ओलीको गलत कार्यशैलीका कारण अहिलेको अवस्था सिर्जना भएको उल्लेख गर्दै पार्टीभित्रको विवादलाई ओलीले फेस गर्न नसकेका कारण देश सङ्कटको अवस्थामा पुगेको बताउनुभयो ।
संसदको निर्णयलाई ओलीले स्वीकार गरेर देशलाई अगाडि बढ्नका लागि वातावरण बनाइदिँदा देशको हित हुने महामन्त्री सिंहको तर्क छ ।
भारतले नेपालमा अस्थिरता चाहेको र अमेरिकाले एमसिसी ल्याएर नेपालमा शैन्यशक्ति भित्राउन खोजेको बताउनुभयो । अब बन्ने सरकारले एमसिसी ल्याउन सक्ने खतरा रहेकाले सचेत हुनुपर्नेमा जोड दिँदै अब बन्ने सरकारको नीति र कार्यक्रमका आधारमा पार्टीले त्यो सरकारलाई समर्थन र विरोध गर्ने बताउनुभयो ।
उहाँले काङ्गे्रस र ओलीको समिकरणमा पनि सरकार बन्न सक्ने र काङ्गे्रस, प्रचण्ड–माधव समूहको नेकपा र मधेसवादीको समिकरणमा पनि सरकार बन्न सक्ने सम्भावना उत्तिकै रहेको बताउनुभयो ।
प्रगतिशील पत्रकार सङ्घ रुपन्देही अध्यक्ष श्यामलाल पोखरेलको अध्यक्षता र कोषाध्यक्ष वीरेन्द्र कुँवरको सञ्चालनमा कार्यक्रम भएको थियो ।
