ठाकुर खनाल/नयाँदिल्ली (भारत) ।।
भारत मुम्बै उच्च न्यायालयका न्यायमूर्ति एसएस. शिन्दे र मनिष पिटोलेको खण्डपिठले ८२ वर्षीय प्रगतिशील कवि वरवरा रावलाई उनको बिग्रदो स्वास्थका कारणले फेब्रेअरी २२ का दिन सर्तसहित जमानतमा छोडेको छ ।
अदालतको दुई सदस्यीय खण्डपिठले जोखिमपूर्ण स्वास्थ स्थितिमा पनि यदि उनलाई जमानत दिइएन भने मानवअधिकार रक्षा गर्ने संविधानको अनुच्छेद २१ अन्तर्गत जीवनको अधिकारमा समाहित स्वास्थको रक्षा गर्ने संवैधानिक कर्तव्यबाट विमुख हुने छौँ भनेका थिए ।
अदालतमा जमानतका लागि कवि वरवरकी पत्नी हेमलताले रिट याचिका दायर गरेकी थिइन ।
कवि रावलाई नवी मुम्बईस्थित तलोजा जेलमा रााखिएको थियो र जेलमै उनको उपचार भएको थियो । जेलमा स्वास्थ गुणवत्ता र सुविधाहरू उपलब्धताको आधारमा न्यायालयकै हस्तक्षेपपछि उनलाई नोभेम्बर २०२० मा मुम्बैको नानावटी अस्पतालमा सिफ्ट गरिएको थियो र उनको त्यहाँ उपचार चलिरहेको थियो ।
जाँच एजेन्सी राष्ट्रिय अन्वेषण अधिकरण (एनआइए) ले जमानतको प्रतिवाद गरि रहेको थियो तर अदातलले सर्तसहित जमानत दिएको छ ।
कस्ता छन् सर्त ?
१. मामिलालाई प्रभावित गर्ने गरी कुनै काम नगर्ने र सहरको एनआइए अदालतको न्यायाधिकार क्षेत्रभित्र रहनुपर्ने ।
२. ५० हजार रुपियाँको बन्ड र त्यत्तिकै रकम बराबरको दुई मुचुल्का दिनुपर्ने ।
३. मामिलासँग सम्बधित कुनै पनि सहआरोपी या उनीहरूसँग सम्बधित व्यक्तिहरूसँग सम्पर्क गर्न या राष्ट्रिय÷अन्तर्राष्ट्रिय फोन गर्नबाट रोक ।
४. मामिलासँग सम्बन्धित सबै सुनुवाइमा सामेल हुनुपर्ने, अदालतद्वारा सोधिएको प्रश्को जवाफ दिनु पर्ने र प्रत्येक १५ दिनमा मुम्बई पुलिसलाई ह्वाटस्पबाट भिडियो कल गर्नुपर्ने ।
मार्क्सवादी विचारधाराका कवि वरवरा राव भारतको माओवादी आन्दोलनप्रति नरम रवैया अपनाउने कविको रूपमा चिनिन्छन् ।
उनी ३१ दिसेम्बर २०१७ मा भारतको पुणेमा आयोजित एल्गार परिषदको कार्यक्रममा भडकाउपूर्ण भाषण दिएको आरोपमा २८ अगस्त २०१७ देखि न्यायिक हिरासतमा रहेका थिए ।
भारतका कैयौँ प्रगतिवदी साहित्यकार, पत्रकार, नागरिक अभियन्ताहरूले निरन्तर उनको रिहाइको माग गर्दै आएका थिए ।
