जगत्प्रसाद रेग्मी/काठमाडौँ ।।
अखिल नेपाल युवक सङ्घको चालिसौँ स्थापना दिवस काठमाडौं जिल्ला समितिको आयोजनामा २०७७ माघ २७ गते बागबजारमा सम्पन्न भएको छ ।
कार्यक्रमको प्रमुख अतिथि सङ्घका केन्द्रीय अध्यक्ष अनिलकिशोर घिमिरेले प्रमुख अथितिको तर्फबाट बोल्दै क्रान्तिकारी आन्दोलनको स्थायित्वका लागि युवाहरूले जिम्मेवारी पूरा गर्नुपर्ने आवश्यकतामा जोज दिनुभयो ।
युवाहरूलाई राजनैतिक, सैद्धान्तिक हिसाबले परिपक्व बनाउनुपर्ने आवश्यकतामा जोड दिँदै उहाँले युवाहरूलाई सचेत बनाउन नसके देश नै बर्बाद खतरातर्फ सचेत गराउनुभयो ।
कार्यक्रमका विशेष अतिथि राष्ट्रिय जनमोर्चाका नेता आनन्दराज शर्माले युवाहरू सचेत र सङ्गठित भए मात्रै नयाँ जनवादी क्रान्ति सम्पन्न गर्न सकिने बताउनुभयो ।
नेकपा (मसाल) को सहायक सङ्गठन भएको हुँदा अखिल नेपाल युवक सङ्घ अझ बढी जिम्मेवार हुनुपर्नेमा उहाँको जोड थियो ।
कार्यक्रममा नेकपा (मसाल) बागमती प्रदेशका प्रवक्ता समीर सिंहले लेनिनवादी सङ्गठनात्मक प्रणालीको बारेमा चर्चा गर्दै छलफलमा स्वतन्त्रता कामकारबाहीमा एकता हुनुपर्ने बताउनुभयो ।
कार्यक्रममा अखिल नेपाल कानुन व्यवसायी सङ्घका महासचिव लक्ष्मणदेव पाण्डे, अखिल नेपाल युवक सङ्घका केन्द्रीय सल्लाहकार रमेश पौडेल, अखिल नेपाल जनजाति सम्मेलनका अध्यक्ष निमबहादुर बुढाथोकी, रक्तिम सांस्कृतिक अभियानका केन्द्रीप्य सचिव हेमराज आश्रम, अखिल (छैठौँ) का अध्यक्ष बिमल पोख्रेल, जातीय समता समाजका केन्द्रीय सदस्य भक्तबहादुर विक, अखिल नेपाल युवक सङ्घका केन्द्रीय सदस्य वीरेन्द्र थापा र नेकपा (मसाल) काठमाडौँका प्रवक्ता जगत्प्रसाद रेग्मीले पनि मन्तव्य राख्नुभएको थियो ।
कार्यक्रमको अध्यक्षता अखिल नेपाल युवक सङ्घ काठमाडौँका अध्यक्ष डम्बर कार्कीले, सञ्चालन जिल्ला उपाध्यक्ष भिम भट्टराईले र स्वागत सचिव दामोदर पाण्डेले गर्नुभएको थियो ।
