पुष्कर भट्ट/महेन्द्रनगर ।।
गणतन्त्र, राष्ट्रियता र धर्म निरपेक्षताको रक्षा गरौँ, ओली सरकारको असंवैधानिक कदम, सङ्घीयता र भ्रष्टाचारको विरोध गरौँ, प्रतिनिधि सभा पुनःस्थापना गरौँ भन्ने नारासहितको एकमहिने अभियानअन्तर्गत आइतवार बेदकोट नगरपालिका वडा नम्बर ८ वडा कार्यालयनजिकको चौरमा राष्ट्रिय जनमोर्चाको विरोधसभा सम्पन्न भएको छ ।
राजमो केन्द्रीय सदस्य तथा सुदूर पश्चिम प्रदेशका अध्यक्ष नन्दराज भट्टको प्रमुख आतिथ्यतामा सम्पन्न उक्त कार्यक्रममा विभिन्न पार्टी परित्याग गरी राष्ट्रिय जनमोर्चामा प्रवेश गरेका थिए ।
यसरी राष्ट्रिय जनमोर्चामा प्रवेश गर्नेहरूमा इन्द्र विष्ट, प्रेम जोशी, मुकेशनाथ, भोजलुहार, सुरेश धामी, सन्तोष लुहार, दुखे लुहार, युवा नेतासमाजसेवी करन कार्की, युवा समाजसेवी दलबहादुर खडायत, नरेन्द्र साउद, मोहन दमाइ, डा. अनिप्रसाद जोशी र नेपाली काङ्ग्रेसका युवानेता घनश्याम जोशीलगायत दर्जनौँ हुनुहुन्थ्यो ।
कार्यक्रममा राजमोका केन्द्रीय सदस्य लोकेन्द्र लम्साल, जातीय समता समाजका महासचिव गोविन्द विक, अखिल नेपाल युवक सङ्घका प्रदेश सदस्य भुपेन्द्र भण्डारी, राजमो जिल्लाध्यक्ष रामबहादुर कार्की, नेकपा (मसाल) का जिल्ला प्रवक्ता लक्ष्मी बडु र जिल्ला सचिव पुष्कर भट्टले सम्बोधन गर्नुभएको थियो ।
सो अववसरमा तराई–मधेस जनवादी मोर्चाका महासचिव राजाराम चौधरी, अखिल नेपाल ट्रेड युनियन महासङ्घ (अन्टुक) का प्रदेश संयोजक जनक कुँवर, रक्तिम सांस्कृतिक अभियानका जिल्ला संयोजक ललित चन्द, अखिल (छैठौं) जिल्लाध्यक्ष महेश भट्ट, राजमो नेता मानबहादुर टेर, युवक सङ्घका जिल्लाध्यक्ष अमिर कुँवर, अन्टुकका नेता कमल साहुलगायत नेताहरूको आतिथ्यता रहेको थियो ।
कार्यक्रमको सञ्चालन अखिल (छैठौं) महासचिव महेशराज जोशीले गर्नुभएको थियो भने स्वागत राजमो जिल्ला सचिव अभिमान थापाले गर्नुभएको थियो ।
कार्यक्रम राजमोका जिल्ला सहसचिव लालबहादुर कुँवरको अध्यक्षतामा सम्पन्न भएको थियो ।
