काठमाडौँ । अखिल नेपाल महिला सङ्घसहितमा चार महिला सङ्गठनले बैतडीकी भागरथी भट्टको बलात्कार तथा हत्याका दोषीलाई कानुनको दायरामा ल्याउन माग गरेका छन् ।

२०७७ माघ २५ गते संयुक्त प्रेसवक्तव्य जारी गर्दै उनीहरूले यस्तो माग गरेका हुन् ।

अखिल नेपाल महिला सङ्घकी अध्यक्ष मीना पुन, अखिल नेपाल महिला सङ्घ (अनेमसंघ) की संयोजक अमृता थापा, नेपाल महिला सङ्घकी अध्यक्ष उमा रेग्मी र विवेकशील साझा महिला सङ्घकी संयोजक रजनी केसीको हस्ताक्षरमा जारी प्रेसवक्तव्यको पूर्ण पाठ यस्तो छ–

“यही माघ २१ गते २ बजेसम्म विद्यालय रहेकी १७ वर्षीय किशोरी साँझ घर नफर्केपछि खोज्ने क्रममा २२ गते अपराह्नतिर क्षत्विक्षत् अवस्थामा शव फेला परेको घटनाले हामीलाई स्तब्ध बनाएको छ ।

बैतडी जिल्ला दोगडाकेदार गाउँपालिका वडा नं. ७ की भागरथी भट्ट १२ कक्षामा अध्ययनरत किशोरीले आज संविधानप्रदत्त अधिकार उपभोग गर्न पाइनन्; किन ? आज एक्काइसौँ शताब्दीको मानव सभ्यताले जवाफ दिनुपर्ने भएको छ । के छोरीहरूले आफ्नो आयु पूर्ण रूपमा जिउन पाउँदैनन् ? पाउँछन् भने हत्या हुने वातावरण किन र कसरी बन्छ ? त्यस्तो वातावरण भए बच्ने वातावरण सृजना किन हुँदैन ? घटना घट्यो भने पनि दोषी आज २४ गतेसम्म पनि पक्राउ किन पर्दैन भने हामीले पक्कै भन्नुपर्छ– शान्ति सुरक्षाको जिम्मा लिएर बस्ने गृह प्रशासन के हेरेर बसेको छ ?

लामो समयको सङ्घर्षद्धारा स्थापना भएको सङ्घीय लोकतान्त्रिक गणतन्त्रले सबैलाई शान्तिपूर्वक बाँच्न पाउने अधिकार मात्र दिएको छैन, अपितु शिक्षा, स्वास्थ्य, रोजगारलाई मौलिक हकमा राखेको छ । तर दिनदहाडै विद्यालयबाट घर फर्कने क्रममा यसरी विभत्स हत्या हुनु र घटनास्थलको प्रारम्भिक अध्ययनले बलात्कार पछि खुल्ने डरले हत्या गरेको आशङ्का गर्ने ठाउँ प्रशस्त देखिन्छ ।

यस्तो संवेदनशील घटनाप्रति हामी महिला हक, हित र अधिकारका लागि सङ्घर्षरत महिला सङ्घहरूको गम्भीर ध्यानाकर्षण भएको छ । हामी संविधानको पूर्ण पालना र आम नागरिकले शान्तिपूर्वक बाँच्न पाउने अधिकारको पूर्ण ग्यारेन्टी चाहन्छौँ र आगामी दिनमा यस्ता घटना नदोरिउन भन्नका खातिर यथाशीघ्र दोषी पत्ता लगाई कानुनको दायरामा ल्याएर हदैसम्मको कार्वाहीको माग गर्दछौँ ।

फक्रन नपाउँदै निमोठिन पुगेकी बैनी भागरथी भट्टप्रति भावपूर्ण श्रद्धाञ्जली व्यक्त गर्देै शोकसन्तप्त परिवारजनमा हार्दिक समवेदना व्यक्त गर्न चाहन्छ ।

पुनश्चः निर्मला पन्तको जस्तो नियति भागरथी भट्टको सवालमा नबनोस्—हामी पुनः स्मरण गराउन चाहन्छौँ ।”