भद्रपुर । पहिलो पटक मेचीपारिको नेपाल–भारत सीमानाकामा अस्थायी प्रहरी बिट बनेको छ ।
भद्रपुर नगरपालिका–५ स्थित मेचीपारिको सीमानाकामा १६ लाख ८० हजार रुपियाँको लागतमा पक्की भवन निर्माण गरी सोमबार उद्घाटन गरिएको हो ।
बिटको उद्घाटन भद्रपुर नगरपालिकाका प्रमुख जीवनकुमार श्रेष्ठले गर्नुभएको थियो ।
वडा प्रहरी कार्यालय, सामुदायिक प्रहरी सेवा केन्द्र र भद्रपुर नगरपालिकाको सहयोगमा अस्थायी प्रहरी बिट २०७७ जेष्ठ २४ गतेबाट निर्माण कार्य सुरु भई यही माघ ५ गते निर्माण सम्पन्न भएको थियो ।
सीमा क्षेत्रमा हुने कुनै पनि किसिमको अपराधिक गतिविधिको रोकथाम तथा नागरिकलाई शान्तिसुरक्षाको प्रत्याभूति दिलाउने उद्देश्यले मेचीपारि प्रहरी बिट स्थापना गरिएको नगर प्रमुख श्रेष्ठले बताउनुभयो ।
मेची नदीपारि पनि नेपाली बस्ती ठुलो छ । मेचीनगर नगरपालिका–१५, भद्रपुर– ५ र ३ मा नेपाली बस्ती रहेको छ । (रासस)
