महेन्द्रनगर । कञ्चनपुरको दोधारा चाँदनीमा भारतीय पक्षबाट गोली प्रहार गरी नेपाली किशोरलाई घाइते बनाएकोप्रति राष्ट्रिय जनमोर्चाले आपत्ति प्रकट गरेको छ । राजमो कञ्चनपुरले मंगलबार एक विज्ञप्ति प्रकाशित गरी घटनाबारे अनुसन्धान गर्न र दोषीहरुमाथि कारबाही गर्न माग गरेको छ ।
राष्ट्रिय जनमोर्चा, कञ्चनपुरका अध्यक्ष रामबहादुर कार्कीले प्रेसित गर्नुभएको विज्ञप्तिमा भारतीय साम्राज्यवादले नेपाली भूमीमा आएर बारम्बार दादागिरी गर्ने गरेपनि सरकार मुकदर्शक बन्ने गरेको भन्दै आपत्ति जनाउनुभएको छ ।
कञ्चनपुरको महाकाली नगरपालिका–१ का १६ वर्षीय नरेश सुनारमाथि सोमबार साँझ ६ बजे भारतीय बजार गडीगोठबाट सामान किनेर घर फर्किंदै गर्दा नेपाल–भारत सीमा क्षेत्रमा गोली प्रहार भएको थियो । खुट्टामा गोली लागेका सुनारको महाकाली अस्पतालमा उपचार भइरहेको छ ।
यो पनि : भारतीय सुरक्षाकर्मीले गोली चलाउँदा कञ्चनपुरमा १६ वर्षीय किशोर घाइते
अध्यक्ष कार्कीद्वारा हस्ताक्षरित विज्ञप्तिमा भनिएको छ,
‘कञ्चनपुरको महाकाली नगरपालिका वडा नं १ का नरेश सुनारमाथि २०७७ पुस २० गते साँझ भारतीय पक्षले गोली प्रहार गरी घाइते बनाएको घटनाप्रति हाम्रो पार्टी राष्ट्रिय जनमोर्चा, कञ्चनपुरको गम्भीर ध्यानाकर्षण भएको छ ।
सिमावर्ती भारतीय बजार गडीगोठबाट सामान किनेर घर फर्कँदै गर्दा सीमा क्षेत्रमा आइपुगेपछि भारतीय सुरक्षाकर्मीले उनलाई डण्डाले हानेर घाइते बनाएका र उठेर भाग्न खोज्दा गोली प्रहार गरेको बुझिएको छ । एक जना निहत्था व्यक्तिमाथि भारतीय पक्षले गरेको उक्त ज्यादतीप्रति हाम्रो पार्टी आपत्ति प्रकट गर्दछ ।
भारतीय साम्राज्यवादले नेपालको सीमा क्षेत्रमा प्रवेश गरी बारम्बार सिमास्तम्भ सार्ने, नेपालीलाई धम्क्याएर सिमा अतिक्रमण गर्ने, नेपाली नागरिकहरुमाथि कुटपिट गर्ने लगायतका दादागिरी गरिरहेको छ । तर, नेपाल सरकार राष्ट्रियतासँग जोडिएका यस्ता संवेदनशील विषयमा समेत मुकदर्शन बन्ने गरेको छ ।
दोधारा चाँदनीमा सोमबार भएको ज्यादती पनि भारतीय साम्राज्यवादले नेपालीहरुमाथि गर्दै आएको दादागिरी प्रवृतिको निरन्तरता हो । हाम्रो पार्टी उक्त घटनाको छानबिन गरी दोषीलाई कडा कारबाहीका लागि पहल गर्न सम्बन्धित निकायसँग माग गर्दछ ।’
रामबहादुर कार्की
अध्यक्ष
राष्ट्रिय जनमोर्चा, कञ्चनपुर
