खुमराय माझी, कुवेत।
कुवेतको आवासीय कानून उल्लंघन गरी गैरकानुनी रुपमा काम गरिरहेका विदेशी श्रमिकलाई वैधानिकता दिन थप एक महिनाको समयावधि दिएको छ ।
कुवेतको आन्तरिक मामिला मन्त्रालयबाट ११ नोभेम्बर २०२० मा जारी निर्णयानुसार कुवेतको आवासीय कानून उल्लंघनकर्ता विदेशी नागरिकहरूले आफ्नो कानूनी वैधता कायम गर्न वा कुवेत छोडी स्वदेश फिर्ती जान १ डिसेम्बर २०२० देखि ३१ डिसेम्बर २०२० सम्म जरिवाना तिर्ने समयावधि तोकेकोमा पुनः मिति २८ डिसेम्बर २०२० को नयाँ निर्यणानुसार सो अवधि १ जनवरी २०२१ बाट शुरू हुने गरी एक महिना थप गरिएको कुवेतस्थित नेपाली दूतावासले जनाएको छ ।
‘थप गरिएको अवधिभित्र समेत आवासीय कानून उल्लंघनकर्ता विदेशी नागरिकहरूले आफ्नो कानूनी वैधता कायम गरेको नपाइएमा निजहरूलालाई कुवेत सरकारको कानून बमोजिम जरिवाना हुने, निजहरूले आवासीय भिसा प्राप्त गर्न नसक्ने र कुवेतमा पुनः फर्कन नसक्ने गरी डिपोर्ट गरिने’ त्यहाँको विदेश मन्त्रालयको सूचनामा जनाइएको नेपाली दूतावासले उल्लेख गरेको छ ।
हजारौं नेपाली नागरिक रोजगारीमा रहेको कुवेतमा कतिपय नेपालीहरु पनि अवैध रुपमा काम गर्ने गरेको बेलामौकामा समाचार आउने गरेको छ । कुवेत सरकारको सो निर्णयले अवैध रुपमा बसेका नेपालीहरुले पनि लाभ लिन सक्ने भएका छन् ।
