खिमबहादुर विक, हैदरावाद ।
मूल प्रवाह अखिल भारत नेपाली एकता समाजका केन्द्रीय सदस्य रामप्रसाद आचार्य प्रवासबाट विदा भएर स्वदेश फर्कनुभएको छ । मूल प्रवाहले एक कार्यक्रम आयोजना गरी नेता आचार्यको सम्मानका साथ भारतबाट विदाई गरेको छ ।
आचार्य काम गर्ने कम्पनीबाट अवकास प्राप्त गरी सदाको लागि स्वदेश फर्कनुभएको हो । उहाँले आजसम्म संगठनलाई दिएको योगदानप्रति मूल प्रवाहले उच्च सम्मान गर्दै विदाई गरेको छ । पुर्ख्यौली थलो बागलुङ रहेका आचार्य हाल नवलपरासी अमरापुरीका स्थायी बासिन्दा हुनुहुन्छ ।
विदाई समारोहमा मूल प्रवाहका केन्द्रीय सचिव प्रेम पौडेल फूल र अबिर प्रदान गर्नुका साथै दोसल्ला ओढाएर सम्मान गर्नुभएको थियो । त्यस क्रममा नेता पौडेलले आजसम्म उहाँले संगठनलाई दिएको योगदान प्रति उच्च सम्मान गर्दै भविष्यमा स्वदेशमा गएर राष्ट्र र राष्ट्रियताको पक्षमा अगाडि बढ्न र शोषित पीड़ित वर्गको निम्ति अग्रपंक्तिमा रही काम गर्न सुझाव दिनुभएको थियो ।
घनश्याम पौडेलको अध्यक्षता र खिमबहादुर विकको सञ्चालनबाट अगाडि बढेको कार्यक्रममा केन्द्रीय प्रतिनिधि के रतन सिंह, क्षेत्रीय अध्यक्ष रामप्रसाद पौडेल, क्षेत्रीय सहसचिव भिमबहादुर थापा, भूतपूर्व क्षेत्रीय अध्यक्ष तथा वरिष्ठ सदस्य प्रेम केसी, क्षेत्रीय सचिवालय सदस्य किष्णबहादुर थापा, दक्षिण नगर समितिका तुलसी आचार्यले विदाई हुनुभएका नेता रामप्रसादआचार्यको उज्वल भविष्यको कामना गर्नुभएको थियो ।
सम्मान तथा विदाई गरिएपछि नेता आचार्यले भारतमा रहँदा जसरी काम गरिएको थियो, स्वदेशमा गएर पनि त्यही रुपमा व्यक्तिगत स्वार्थलाई परित्याग गरी देश र जनताको पक्षमा संघर्षको मैदानमै रहने बचनवद्धता प्रकट गर्नु भएको थियो ।
कार्यक्रममा रक्तिम सांस्कृतिक अभियानका कलाकारहरुले प्रस्तुत गरेको जोशिलो सांस्कृतिक कार्यक्रमले माहोल उमंगमय बनेको थियो ।
यो पनिः यस्तो रह्यो हैदरावादमा विरोध सभा, महिला र विद्यार्थी विभागको क्षेत्रीय भेला (फोटो)
