बागलुङ बजार । बागलुङको दक्षिणी दुर्गम गाउँ बरेङ गाउँपालिका–५ सुखौरामा लिफ्टिङ खानेपानी परियोजना पूरा हुने भएको छ ।
२५८ घरमा लिफ्टमार्फत खानेपानी ल्याउने काम दुई वर्ष अघिदेखि सुरु भएसँगै सुखौराका जनताले खानेपानी पाउने भएका हुन् । गण्डकी प्रदेश सरकारले दुई वर्षदेखि लिफ्टमार्फत खानेपानी पुर्याउने गरी आयोजना सञ्चालन गरेको हो ।
सात करोड ९८ लाख रुपियाँको लागतमा सुखौराका एक हजार ५४८ जनसङ्ख्यालाई पुग्ने गरी बृहत् खानेपानी आयोजनाको काम धमाधम चलिरहेको छ । आयोजनाको काम धमाधम निर्माण भइरहको र अहिलेसम्म ६० प्रतिशत आयोजनाको काम सकिएको खानपानी तथा सरसफाइ डिभिजन कार्यालय बागलुङका इञ्जिनीयर विक्रम शाहले जानकारी दिए ।
खानेपानी आयोजना सुरु भएको २०७५ चैतदेखि अहिलेसम्म दुई करोड ६२ लाख ३८ हजार रुपियाँ खर्च भइसकेको बरेङ सुखौरा लिफ्ट खानेपानी आयोजना उपभोक्ता समितिका अध्यक्ष अनिल भट्टराईले जानकारी दिए । उनका अनुसार तम्मुखोला छेउमा रहेको मुहानमा एक लाख लिटरको ट्याङ्की निर्माण गरी एक हजार २५० मिटरमाथि पुर्याएर सुखौरा गाउँलाई वितरण गर्ने गरी आयोजना निर्माण भइरहेको छ ।
मुहानको पानीलाई ६४५ मटिरमाथि पुर्याएर ट्याङ्कीमा हालिन्छ । त्यहाँबाट केही गाउँमा वितरणपश्चात पुनः ६४० मिटरमाथि पुर्याएर सुखौराको पूरै गाउँलाई खानेपानी पुर्याइन्छ । खानेपानीको मुहान र धम्पुगाउँमा एक/एक लाख लिटरको ट्याङ्की, एक हजार २५० मिटर स्टिल तथा जिआई पाइप, १५ किलोमिटर वितरण पाइप, १५ शाखा ट्याङ्की, लिफ्टका लागि आवश्यक केन्द्रीय विद्युतको दुई किलोमिटर प्रसारण लाइन निर्माण, नौ वितरण इन्टेक, मुहानमा सौचालयसहितको एककोठे भवनलगायतका संरचना निर्माण भइसकेका छन् ।
यस वर्ष आयोजना अगाडि बढाउन रु ७४ लाख बजेट विनियोजन भएको छ । अर्काे आर्थिक वर्षभित्र बजेट पुगेमा आयोजना सम्पन्न गर्ने गरी काम भइरहेको बरेङ–५ सुखौराका वडाध्यक्ष अम्मरबहादुर सरबुर्जाले जानकारी दिए । योजनामा स्थानीयवासीले २० प्रतिशत श्रमदान गर्दै आएका छन् ।
सुखौराको धम्पु र बाहुनडाँडामा सात वर्षअघि खानेपानी तथा सरसफाइ परियोजनाअन्तर्गत सोलारबाट ५६ घरमा खानपानी पुर्याए पनि अन्य घरमा चरम सङ्कट रहँदै आएको छ । त्यहाँका अधिकांश समुदायले हिउँदको फागुन, चैत, वैशाख र जेष्ठ महिनामा दुई घण्टा हिँडेर पानी ल्याउने गरेका छन् ।
राष्ट्रिय जनमोर्चाको तर्फबाट गण्डकी प्रदेश सांसद पियारी थापाको विशेष पहलमा सो खानेपानी आयोजना निर्माण हुन लागेको हो ।
