गोविन्द विष्ट, मलेसिया ।
सल्यान जिल्ला निगाल –६ निवासी रुद्रबहादुर कामीको मलेसियाबाट नेपाल जाने तयारी गर्दागर्दै मलेसियामै अचानक मृत्यु भएको छ ।
वैदेशिक रोजगारीको क्रममा मलेसियामा आएका नेपाली श्रमिक रुद्रबहादुर कामी पहिले कार्यरत रोजगारदाता कम्पनी छाडेर पछिल्लो समयमा अवैधानिक हैसियतमा सुरक्षागार्डमा काम गर्दै आएका थिए।

अबैधानिक अवस्थामा रहेका कामी बिरामि परेर काम गर्न नसक्ने अवस्थामा पुगेपछि मलाया खबर मार्फत सहयोगको अपिल गर्दागर्दै मलेसिया स्थित नेपाली राजदूतावास त्यस्तै गैर आवासीय नेपाली संघ (एनआरएनए), पीएनसीसी लगायतको संघसंस्थाको सम्पर्कमा पुगेका थिए।

नेपाल राजदूतावासको सम्पर्कमा आएपछि आवश्यक समन्वय गर्दै बिभिन्न संघ संस्थाले उनलाई प्राथमिक उपचार समेत गराएका थिए। साथै नेपाल राजदूतावासले उनलाई नेपाल पठाउन आवश्यक कागजात बनाउने क्रममा रहेको थियो।

उद्धारमा खटिएका एक नेपालीका अनुसार ब्लडप्रेसर हाई, खुट्टा सुन्निएको, बारम्बार खोकीरहने, मुखबाट रगत वान्ता हुने लगायतको समस्याबाट ग्रसित कामीलाई थप उपचार र बिरामी मानिस नेपाल फर्किन आवश्यक पर्ने फिट–टु फ्लाइट डकुमेन्ट बनाउनको लागी बुधबार बिहान १० बजे अस्पताल अथवा क्लिनिक लाने योजना रहेको थियो । तर आजै बुधबार बिहानै ९ः३० तिर आफू बसेको कोठाको भर्याङबाट तल झर्ने क्रममा लडेर टाउको फुटेर घाइते भएका थिए। उनी लडेर घाइते भएपछि लगत्तै अस्पताल लैजानको लागी एम्बुलेन्स बोलाइएको थियो ।

तर, एम्बुलेन्स आइन्जेलसम्म उनको मृत्यु भईसकेको प्रत्यक्षदर्शीले बताए । अहिले मलेसियन कानुन अनुसार उनको पोष्टमार्टम लगायत प्रक्रियाको लागि मृत शव मलेसियन प्रहरीले लगेको छ भने बाँकी प्रक्रियाको लागि नेपाल राजदूतावासले पहल गरिरहेको जानकारी प्राप्त भएको छ ।