खुम रायामाझी,कुवेत ।
नेपाली राजदूतावास कुवेतकी श्रमसहचारी विपना ज्ञवालीको गत शुक्रवार मृत्यु भएको छ।रक्त क्यान्सरको कारण उनले अल्पाआयुमै ज्यान गुमाएकी हुन्। कुवेतका लागि नेपाली श्रम सहचारी विपना ज्ञवालीको पार्थिव शरीर आज (आइतबार ) विहान नेपाल पुगेको छ । ज्ञवालीको शव उनका दाजु र दिदीको साथमा कुवेतको जजिरा एयरलाइन्समार्फत नेपाल पठाइएको नेपाली दूतावास श्रोतले बताएको छ ।
करिव २८ वर्षकी ज्ञवाली गुल्मीको चिदिकाकी हुन् । अविवाहित रहेकी ज्ञवाली लामो समयदेखि क्यान्सर रोगसँग जुधिरहेकी थिइन् । गत बुधबारदेखि उनलाई रोगले गम्भीर रूपमा च्यापेको थियोे । स्वास्थ्यमा सुधार नभएपछि शुरूमा उनले नेपाली दूतावास नजिकै रहेको मुवारक अल काबीर अस्पतालमा कोरोना भाइरस (कोभिड–१९) परिक्षण गराएकी थिइन् । परीक्षणमा रिपोर्ट नेगेटिभ आए पनि उनलाई राहत भने मिलेको थिएन ।
त्यसपछि उनलाई मुवारक अस्पतालले शेख अल वर्दिस क्यान्सर अस्पतालमा रिफर गरेर पठायो । कुवेतमा दाइ निरञ्जन ज्ञवाली र दिदी सपना ज्ञवालीसहित परिवारका सदस्य भएपनि उनको बसाई एक्लै थियोे । तीन महिना अघि उनीसँगै कुवेत गएकी उनकी आमा शुक्रबार बिहान मात्र नेपाल फर्केकी थिइन् । छोरीको आईसीयुमा भर्ना भएपनि उपचारमा अपेक्षित सफलता नभएपछि आमा पनि बस्न नसकेर नेपाल फर्केकी थिइन् । आमा नेपाल फर्केकै दिन ज्ञवालीको निधन भएको थियो ।
नेपालमा लकडाउनको समयमा भएको प्रतिस्पर्धामा श्रम सहचारीमा छनोट भएकी ज्ञवाली तत्कालीन श्रम सहचारी ज्ञानेन्द्र शर्माले आफ्नो कार्यकाल सकेर नेपाल फर्केको दिन नै कार्यस्थलमा कुवेत पुगी कार्यभार सम्हालेकी थिइन् ।
विपनाको असामयिक निधनप्रति दुःख व्यक्त गर्दै नेपाली राजदूतावास,कुवेतले आज एक शोक वक्तव्य पनि जारी गरेको छ।
