खिमराज चालिसे ।।
तानसेन । नेपाली समाजमा खासगरी, हिन्दु धर्मको मूल्य र मान्यताका आधारमा टिकेको मृत्युसंस्कारलाई मूल प्रवाह अखिल भारत नेपाली एकता समाजका केन्द्रीय सदस्य कुलबहादुर बगालेले चुनौती दिँदै आफ्ना बुबाको मृत्यु संस्कार गर्नुभएन ।
पाल्पा जिल्ला रिब्दिकोट गाउँपालिका–७ कोहोतुङ निवासी तथा मूल प्रवाह अखिल भारत नेपाली एकता समाजका केन्द्रीय सदस्य बगालेका बुबा रिखबहादुर बगालेको गत डिसेम्बर ९, २०२० का दिन निधन भएको थियो ।
त्यसपछि मृत्युपरान्त गरिने काजक्रियामा सामेल हुन भारतबाट नेपाल पुगे पनि उहाँले समाजसामु आफ्नो स्पष्ट मत राख्दै बुबाको मृत्युसंस्कार बहिस्कार गरी वर्तमान रूढीवादी धार्मिक संस्कारको विरुद्ध वैज्ञानिक सिद्धान्तमा आधारित मृत्युसंस्कारलाई मान्ने र आध्यात्मिकतामा आधारित सडेगलेको कुसंस्कारको अन्त्यका लागि सामाजिक रूपमा नै यस प्रकारको बहिस्कार आन्दोलन चलाइराख्नुपर्ने विचार व्यक्त गर्नुभएको थियो ।
हामीसँग कुलबहादुर बगालेसित फोनमार्फत भएको कुराकानीमा उहाँले यो कार्यमा महत्त्वपूर्ण सहयोग/समर्थन गर्ने राजमो जिल्लाध्यक्ष बिशाल दर्लामी तथा सम्पूर्ण जिल्लावासी राजमोका कार्यकर्ता, इष्टमित्र, छरछिमेकी र यो गौरवमय बाटो हिड्न सिकाउने मूल प्रवाह अखिल भारत नेपाली एकता समाज र सहयोगी कार्यकर्ताप्रति धन्यवाद व्यक्त गर्नुभयो ।
राष्ट्रिय जनमोर्चा पाल्पाका अध्यक्ष विशाल दर्लामीले यसबारे प्रतिक्रिया दिँदै कुलबहादुर बगालेको उपर्युक्त कार्यले समाजमा प्रगतिशील विचारका लागि सकारात्मक सन्देश दिइरहेको बताउनुभयो । उहाँले भन्नुभयो– ‘बगालेजीको कदमले समाजको प्रगतिशील रूपान्तरणमा महत्त्व राख्दछ ।’
