काठमाडौं । रौतहटमा रहेको श्रीराम सुगर मिलले उखु किसानको ३० करोड बक्यौता तिर्ने प्रक्रिया अघि बढाएको छ । श्रीराम सुगर मिलका सञ्चालक हितेश गोल्छा, विशाल अग्रवाल र कार्यकारी उपाध्यक्ष पद्मकान्त झालाई पक्राउ गर्न पुर्जी जारी भएपछि उनीहरु किसानको मूल्य तिर्न तातेका हुन् ।
कम्पनीले आफ्नो ३० करोड रुपैयाँ बक्यौता रहेको र उक्त रकम आइतबारसम्म किसानको बैंक खातामा पुर्याउने गरी प्रक्रिया अघि बढाएको जानकारी दिएको छ । उनीहरुले ३० करोड रुपैयाँ भुक्तानीको लागि तयार भएको भन्दै छलफलमा आएको उद्योग वाणिज्य तथा आपूर्ति मन्त्रालयले जनाएको छ ।
गृह मन्त्रालयले नवलपरासी, सर्लाही र रौतहटका जिल्ला प्रशासन कार्यालयहरुलाई उद्योगीलाई पक्राउ गरी भुक्तानी दिलाइदिन निर्देशन दिएपछि उद्योगीहरु भुक्तानी तिर्न तातेका हुन् ।
पैसा नपाएसम्म फिर्ता जाँदैनौंः कृषकहरु
यता उखु किसानहरुले भने आफ्नो रकम नपाएसम्म घर नफर्कने अडान लिएका छन् । गत मंसिर २८ गतेदेखि काठमाडौं आएर आन्दोलन थालेका किसानहरु उखुको बाँकी रहेको रकम भुक्तानीको माग गर्दै बिहीबार पनि आन्दोलन जारी राखे ।
मन्त्रालयले गत वर्ष पुष १८ गते माघ ७ गते भित्र भुक्तानी दिने गरी किसान र उद्योगीबीच सम्झौता गराएको थियो । तरपनि उद्योगीहरुले एक वर्षसम्म पैसा नदिएपछि काठमाडौं आएर फेरि आन्दोलन गर्न बाध्य भएको किसानहरुले बताएका छन् ।
उनीहरुको भुक्तानीको विश्वसनीय पूर्ण सुनिश्चितता नभएसम्म आन्दोलन जारी राख्ने बताएका छन् । किसानहरुले प्रधानमन्त्री राहत कोष वा अन्य कुनै राज्यकोषबाट भएपनि बाँकी बक्यौता भूक्तानी गरी सरकारले नै उद्योगीहरुबाट ब्याजसहित असुलउपर गर्नुपर्ने बताएका छन् ।
