काठमाडौं । रसुवाकी एक बालिकाले कानमा लगाएको मुन्द्री लुट्न उनको अपहरणपछि हत्या भएको छ । रसुवाको कालिका गाउँपालिका १ फेलाङका अमितकुमार तामाङकी ६ वर्षीया छोरी सुमिनाको हत्या गरी एक युवतीले उनको कानको मुन्द्रा लुटेकी हुन् ।
बालिकाको अपहरण तथा हत्या गरेको आरोपमा प्रहरीले नुवाकोटको किस्पाङ गाउँपालिका ५ की १९ वर्षीया सपना तामाङलाई पक्राउ गरेको छ । सपनाले बालिकाको मुन्द्रा लुटेको स्वीकार गरेकी छन् । सो मुन्द्रा उनले ६ हजारमा बेचेको खुलासा भएको छ । मुन्द्रा किन्ने सुन पसलेलाई पनि प्रहरीले पक्राउ गरेको छ ।
गत आइतबार विद्यालय गएर घर फर्केकी बालिका घर नपुगेपछि खोजी सुरु भएको थियो । बालिकालाई आमा भएको ठाउँमा पु¥याइदिन्छु भन्दै सपनाले चकलेट र चाउचाउ दिएर विद्यालयभन्दा २ किलोमिटर पर लगेर सुनका मुन्द्रा खोलेकी थिइन् ।
बालिकाले आमाबुबालाई भनिदिन्छु भनेपछि युवतीले बालिकाको घाँटी डोरीले बाँधेर हत्या गरेको प्रहरीले जनाएको छ । हत्यामा प्रयोग भएको डोरी र सुन बेचेको पैसा प्रहरीले बरामद गरेको छ ।
खोजतलासका क्रममा बालिकाको शव मंगलबार विद्यालयभन्दा २ किलोमिटर टाढा रहेको नागार्दुङ ओढारमा फेला परेको थियो ।सपना यसअघि पनि विभिन्न अपराधमा संलग्न रहेको पाइएको छ ।
उनले विद्यालयबाट फर्किंदै गरेकी बालिकाको कानमा सुनका मुन्द्रा देखेपछि लुट्ने योजना बनाएको प्रहरीलाई बयान दिएकी छन् । उनीविरुद्ध म्याद थप गरी घटनाबारे थप अनुसन्धान भइरहेको प्रहरीले जनाएको छ ।
