काठमाडौं । काठमाडौंको कलंकीमा शुक्रबार साँझ भएको दुर्घटनामा एक जनाको ज्यान गएको छ भने सात जना घाइते भएका छन् । थानकोटबाट कलंकीतर्फ आउँदै गरेको ट्रकको ब्रेक फेल भएर अन्य ६ वटा सवारी साधनलाई ठक्कर दिँदा सो दुर्घटना भएको हो ।

प्रदेश २ ०३००१ ख १४२० नम्बरको मालबाहक ट्रक ब्रेक फेल भएर अनियन्त्रित बनेको प्रहरीले जनाएको छ । दुर्घटनामा परी ओखलढुंगाका करिव ३० वर्षीय शंकर परियारको मृत्यु भएको महानगरीय प्रहरी वृत्त कालीमाटीले जनाएको छ ।

सप्तरीका २६ वर्षीय रञ्जीत चौधरी, धादिङका ३६ वर्षीय रामचन्द्र सिंखडा, काठमाडौं कलंकीका ३२ वर्षीय सुजन मानन्धर, बानेश्वरका २४ वर्षीय विशाल श्रेष्ठ, कास्कीकी ३० वर्षीया सन्ध्या थिङ घाइते भएकी छन्। घाइते मध्ये ३० वर्षीय गणेश शर्मा र २२ वर्षीय साजन खत्रीको भने ठेगाना खुलेको छैन।