काठमाडौँ । उनन्तिसौँ अन्तर्राष्ट्रिय अपाङ्गता दिवसको सन्दर्भमा ३० जना दृष्टिविहीनलाई श्रव्य पुस्तक वितरण गरिएको छ । श्रव्य पुस्तकालय तथा श्रोतकेन्द्रको आयोजनामा २०७७ मङ्सिर २३ गते आयोजित एक कार्यक्रममाझ पुस्तक वितरण गरिएको हो ।
कीर्तिपुर नगरपालिकाका प्रमुख रमेश महर्जनको प्रमुख आतिथ्यता तथा उपप्रमुख सरस्वती खड्काको विशिष्ट आतिथ्यतामा नगरपालिकाको सहकार्यमा सो कार्यक्रम आयोजना गरिएको थियो । श्रोतकेन्द्रका अध्यक्ष रमेशबाबु तिवारीको सभापतित्वमा नगरपालिकाको कार्यालयमा सम्पन्न सो कार्यक्रममा कक्षा ११ देखि स्नातक, स्नात्तकोत्तर तहमा अध्ययन गर्ने विद्यार्थीलाई श्रव्य पुस्तक वितरण गरिएको थियो ।
“कोभिड–१९ पश्चात्को उत्कृष्ट पुनरागमनको सुनिश्चितता : अपाङ्गता भएका व्यक्तिको पहुँच र दिगो विकासका लागि हामी सबैको प्रतिबद्धता” नाराका साथ सम्पन्न उक्त कार्यक्रममा लोक सेवा आयोग, शिक्षा सेवा आयोग, प्राविधिक सहायक, विद्यालय निरीक्षकलगायत कक्षा ११ देखि स्नात्तकोत्तर तहसम्मका ५५ थान श्रव्य पुस्तक, मेमोरी तथा पेनड्राइभमा कपी गरी दिइएको थियो ।
कार्यक्रममा स्वागत मन्तव्य संस्थाका कोषाध्यक्ष बालकृष्ण उप्रेतीले राख्नुका साथै संस्थाको अवधारणा पत्र पेस गर्नुभयो ।
कार्यक्रममा मन्तव्य नगर प्रमुख रमेश महर्जन, उपप्रमुख सरस्वती खड्का, राष्ट्रिय अपाङ्ग युवा सञ्जालका अध्यक्ष महेन्द्र थापा, श्रव्य पुस्तक प्राप्त गर्नेमध्येका नेपाल टेलिकममा रोजगाररत गौतम पोखरेलले आआफ्ना धारणा राख्नुभएको थियो ।
