खुम रायामाझी, कुवेत ।
बागलुङका एक पीडित परिवारलाई कुवेत नेपाली एकता समाजले आर्थिक सहयोग गरेको छ। जिल्लाको जैमिनी नगरपालिका वडा नं.–९ निवासी गोविन्द नेपालीको गत कार्तिक १० गते साँझ घर फर्किंदै गर्दा बाटोमा लडेर मृत्यु भएको थियो ।
नेपालीको मृत्युपछि समस्यमा परेका पाँच छोरी र श्रीमतीलाई समाजले आर्थिक सहयोग गरेको हो । मृतक गोविन्दका दाजु तथा कुवेत नेपाली एकता समाजका केन्द्रीय सदस्य गोपाल नेपालीले पीडित परिवारको आर्थिक अवस्थाबारे जानकारी दिँदै सहयोगका लागि अनुरोध गर्नुभएको थियो ।
त्यसपछि तत्कालै बसेको एकता समाजको अनलाइन बैठकले आन्तरिक अभियान सञ्चालन गरी सहयोग गर्ने निर्णय अनुरुप नेपाली रुपैयाँ ३४ हजार संकलन गरी नेपाल पठाएको समाजका अध्यक्ष निम बुढामगरले जानकारी दिनु भएको छ ।
कुवेत नेपाली एकता समाजले पठाएको उक्त रकम सोमवार मृतकको घरमै पुगी राष्ट्रिय जनमोर्चाका नेता लिलाधर जैसी, वडा अध्यक्ष भगिन्द्रकुमार थापा तथा राम पौडेलले मृतककी श्रीमतीलाई हस्तान्तरण गर्नुभएको छ ।
कार्यक्रममा राजमोका नेता कार्यकर्ता तथा स्थानीयको उपस्थिति रहेको थियो ।
