गणेश अधिकारी, पोखरा ।
पोखराको पृथ्वीनाराण क्याम्पसका आंशिक प्राध्यापकहरु समान कामको समान ज्याला दिन माग गर्दै काठमाडौं आएका छन् । लामो समयदेखि आन्दोलनरत आंशिक प्राध्यापकहरुले त्रिभुवन विश्वविद्यालयका उपकूलपति धर्मकान्त बास्कोटालाई भेट गरेका छन् ।
पीएन क्याम्पसमा केही समयदेखि तालाबन्दी गरेर आन्दोलनमा उत्रिएका आंशिक प्राध्यापकहरुले क्याम्पस व्यवस्थापनबाट समस्या समाधान नभएपछि उपकूलपति डा. बास्कोटालाई गुहारेका हुन् । प्राध्यापकहरुलाई अखिल (छैठौं), अनेरास्ववियू, नेविसंघ, अखिल (क्रान्तिकारी) लगायतका विद्यार्थी संगठनहरुले समेत साथ दिएका छन् ।
यद्यपी अखिल (छैठौं) का केन्द्रीय उपाध्यक्ष गणेश अधिकारीका अनुसार विद्यार्थी संगठनहरुले भने प्राध्यापकहरुका माग पुरा गराउन आफूहरुले पनि साथ दिने तर लामो समयसम्म क्याम्पससमा तालाबन्दी गर्न नदिने बताएका छन् ।
कार्यक्रममा उपकुलपति डा. बासकोटाले आंशिक शिक्षकहरुको समस्या केबल एउटा क्याम्पसको मात्र नभएकोले यसलाई सदाका लागि अन्त गर्न केही समय लाग्ने भन्दै त्यसका लागी आवस्यक दरबन्दी पुरा गर्नुपर्ने बताउनुभयो ।
त्यसका लागि क्याम्पसबाट विद्यार्थी संख्या सहित अहिले भैरहेका स्थायी र आंशिक शिक्षकहरुको तथ्यांक पुस मसान्तसम्म उपलब्ध गराउन आग्रह गर्दै उहाँले समस्या समाधानको प्रतिवद्धता जाहेर गर्नुभएको थियो ।
