जगदीश ढकाल, कोहलपुर ।
राष्ट्रिय जनमोर्चाका पूर्व महासचिव एवं पूर्व सांसद हरि आचार्यले विदेशी साम्राज्यवादीहरुको इसारामा नेपालमा भित्र्याइएको संघीयताले देशको राष्ट्रियता खतरामा पर्दै गएको बताउनुभएको छ ।
आइतबार राष्ट्रिय जनमोर्चाले बाँकेको कोहलपुरमा आयोजना गरेको विरोध सभामा बोल्दै नेता आचार्यले संघीयताका कारण राष्ट्रियता खतरामा परेकोले त्यसलाई खारेज गर्नुको विकल्प नभएको बताउनु भयो ।
आचार्यले गणतन्त्रका लागि लडेका शक्तिहरुबीच अकर्मण्यता भएका कारण कम्बोडिया ,जापान लगाएत देशहरुमा प्रतिगमन भएको इतिहासको उदाहरण दिँदै नेपालका गणतन्त्र पक्षधर राजनीतिक शक्तिहरुबिच राष्ट्रको हितमा एकजुट हुनुपर्ने आवश्यकता औँैल्याउनु भयो ।
कोरोना महामारीको अवस्थामा समेत सत्तामा बस्नेहरुबाटै देशको ढुकुटीमा ब्रम्हलुट मच्चाउने काम भएको, किसानहरुलाई मल विउको व्यवस्था गर्न नसकेको, जनताले दिएको भोटले जनताकै ढाड सेक्ने काम हुनु दुर्भाग्यपूर्ण भएको आचार्यले उल्लेख गर्नुभयो ।
विरोध सभामा अखिल नेपाल किसान महासंघ बाँकेका संयोजक जोगप्रसाद भण्डारी, अखिल नेपाल युवक संघ बाँकेका अध्यक्ष भरत खड्का, अखिल नेपाल महिला संघ बाँकेकी अध्यक्ष पुर्णकला भण्डारी, अखिल (छैठौं) बाँकेका अध्यक्ष नमराज चन्द लगायतले सम्बोधन गर्नुभएको थियो ।
राजमो बाँकेका अध्यक्ष भिमप्रसाद देवकोटाको अध्यक्षतामा सम्पन्न कार्यक्रमको सञ्चालन जिल्ला उपाध्यक्ष जगदीश ढकालले गर्नुभएको थियोे ।
राष्ट्रिय जनमोर्चाले देशव्यापी आयोजना गरेको संघीयता विरुद्धको कार्यक्रम अन्तर्गत बाँकेको कोहलपुरमा विरोध सभाको आयोजना गरिएको हो । राजमोले संघीयता खारेजी ,एमसीसी सम्झौता खारेज गर्नुपर्ने, देशमा बढ्दै गइरहेको हत्या हिंसा, बलात्कारका घटना बन्द गर्नुपर्ने, कोरोना महामारीबाट जनताको जनधनको सुरक्षा गर्नुपर्ने लगायतका मागहरू राखी विरोध सभाको आयोजना गरेको राजमोले जनाएको छ ।
