चन्द्रौटा । कपिलवस्तुका ‘फुच्चे गाइड’ राहुल साहनी भेटिनुभएको छ । कपिलवस्तु नगरपालिका–३ घर हुनुभएका साहनी गत कात्तिक १७ गते बिहानदेखि सम्पर्कविहीन हुनुहुन्थ्यो ।
कपिलवस्तु, यशोधरा गाउँपालिका –७ मर्यादपुर नजीकै भारतबाट नेपालतर्फ आउँदै गरेका अवस्थामा बुधबार उहाँ फेला परेको प्रहरी उपरीक्षक नवराज अधिकारीले बताउनुभयो । शुद्धोधनको राजदरबार तिलौराकोटमा आउने पर्यटकलाई पथप्रदर्शन काम गर्ने साहनी बेपत्ता भएपछि परिवार, प्रहरी तथा अन्य सरोकार पक्षले खोजी गरेका थिए ।
प्रहरीले साहनीलाई बुबा रिङ्कु मल्लाहका साथ सकुशल जिम्मा लगाएको छ । सामान्य परिवारका ११ वर्षीय साहनीले सिद्धार्थले २९ वर्ष बिताएको तिलौराकोट आउने विभिन्न देशका पर्यटकलाई पर्यटकीय महत्वका विषयमा बुझाउँदै आउनुभएको छ । उहाँसँग नेपाली, हिन्दी, अङ्ग्रेजी, चिनियाँ, थाईलगायत सात भाषाको ज्ञान छ ।
दिदीका घरमा २० दिन गत कात्तिक १७ गते विद्यालय जान्छु भनेर साइकलसहित निस्कनुभएका साहनी खुनुवा हुँदै राति ११ बजे भारतको बढनी पुग्नुभयो । बढनीबाट गोरखपुर जाने बसको छतमा साइकल राखेर १८ गते बिहान ११ बजे गोरखपुर ओर्लिनुभयो । गोरखपुरबाट बरालगञ्ज जाने बस चढेर अपराह्न साढे ३ बजे उहाँ बेलिपार्कमा आमाको काकाकी छोरी मीरा साहनीका घरमा पुग्नुभयो ।
दिदीका घरमा झण्डै २० दिन बसेपछि आमाबुबाको मायाले सताएकाले आफू फर्किएको साहनीले बताउनुभयो । जम्मा तीन सय भारतीय रुपियाँ आफूसँग रहेकाले कतिपय ठाउँमा यात्रु भाडा दिएको र कतिपय ठाउँमा कार्ड देखाएर भाडा नदिने गरेको साहनीले बताउनुभयो ।
बन्दाबन्दीपछि विद्यालय हप्तामा दुई दिन मात्र सञ्चालन हुने गरेको तर घरबाट सधैँ पढ्न जान दबाब दिने गरिएकाले आफू भागेको प्रहरीसमक्ष उहाँले बताउनुभयो ।(रासस)
