महोत्तरी । बर्दिवासमा ६ वर्षीया बालिकाको बलात्कारपछि हत्या भएको घटना विरुद्ध स्थानीयले गरेको प्रदर्शनमाथि प्रहरीले गोली चलाएको छ । प्रहरीको गोली लागेर तीन प्रदर्शनकारी घाइते भएका छन् ।
स्थानीयका अनुसार गोली लागेर बुद्धिराज न्यौपाने, अफताब आलम र श्याम कार्की घाइते भएका छन् । न्यौपानेको तिघ्रामा, आलमको टाउकोमा गोली लागेको छ । उनीहरूको स्थानीय अस्पतालमा उपचार भइरहेको छ ।
बर्दिवास–१४ का सहिद अन्सारीकी ६ वर्षीया छोरी गुलबसा खातुनको सोमबार राति बोरामा राखेर फालिएको शव फेला परेको थियो । आइतबार साँझदेखि बेपत्ता थिइन् । उनको बलात्कारपछि हत्या भएको आफन्तले बताएका छन् ।
हत्या गरिएकी बालिकाको शव सडकमा राखेर मङ्गलबार स्थानीयले राजमार्ग अवरुद्ध गरेका छन् । प्रदर्शनकारीलाई नियन्त्रणमा लिन प्रहरीले गोली चलाउनुका साथै दर्जनौँ सेल हवाइ फायर र अश्रुग्याँस प्रहार गरेको छ ।
बालिकाको हत्या गरेको आशङ्कामा प्रहरीले गौशाला नगरपालिका–५ का २५ वर्षीय अरुणकुमार साहलाई पक्राउ गरेको छ । साहले बालिकाको हत्या गरेको स्वीकारिसकेको प्रहरीले जनाएको छ ।
टायर बालेर नाराबाजी गरिरहेका स्थानीयले पक्राउ परेका साहको घरमा आगजनीसमेत गरेका छन् । अहिले सडकमा सशस्त्र, नेपाल प्रहरी र नेपाली सेना परिचालन गरिएको छ ।
