काठमाडौं । नेपालमा कोरोनाका भाइरसका कारण मृत्यु हुनेको संख्या १ हजार ३ सय नाघेको छ । स्वास्थ्य तथा जनसंख्या मन्त्रालयका अनुसार पछिल्लो २४ घण्टामा कोरोना संक्रमणबाट थप ७ जनाको मृत्यु भएसँगै अहिलेसम्म मृत्यु हुनेको संख्या १ हजार ३०५ पुगेको छ ।

मन्त्रालयले शनिबार दिएको जानकारी अनुसार पछिल्लो २४ घण्टामा देशभरमा थप १ हजार ६७४ जनामा कोरोना पुष्टि भएको छ । योसँगै नेपालमा कोरोना संक्रमितको संख्या २ लाख १८ हजार ६३९ पुगेको छ।

उपत्यकामा थपिए ८९९ कोरोना संक्रमित
पछिल्लो २४ घण्टामा काठमाडौं उपत्यकामा ८९९ जना कोरोना संक्रमित थपिएका छन्। मन्त्रालयका अनुसार उपत्यकाका तीन जिल्लामा ३८७ महिला र ५१२ पुरुष गरी ८९९ जनामा कोरोना पुष्टि भएको हो ।

काठमाडौंमा ६८५, भक्तपुरमा ४९ र ललितपुरमा १६५ जना संक्रमित थपिएका हुन्।