काठमाडौं । कोरोना संक्रमण कतिपय व्यक्ति तथा सरकारी गैर सरकारी कार्यालयहरुका लागि कमाउने राम्रो मौका मिलेको सप्तरीको बोदे बर्साइन नगरपालिकाले पुष्टि गरेको छ । नगरपालिकाले संक्रमण नियन्त्रणका नाममा सार्वजनिक गरेको खर्च विवरण उदेकलाग्दो मात्रै छैन, कोरोनाका नाममा कसरी करोडौं रुपैयाँ भ्रष्टाचार भइरहेको छ भन्ने उदाहरण पनि दिएको छ ।
बजारमा पाइने एउटा लाइफबोय साबुनको मूल्य रुपैयाँ ३० पर्छ । तर यही साबुनका लागि बोदे बर्साइन नगरपालिकाले भने ३ हजार ८३१ रुपैयाँ ४२ पैसाको बिल बनाएको छ ।
सो नगरपालिकाले कोरोना संक्रमणका लागि गरेको खर्च विवरण सार्वजनिक गरेको छ । २ करोड २१ लाख ३४ हजार ३ रुपैयाँ खर्च भएको विवरणमा स्यानिटाइजर, साबुन, झुल, म्याट्रेस, मास्क, पञ्जा लगायतका सामग्रीको खर्च मनपरी लेखिएको छ ।
नगरपालिकाले प्रमाणित गरेको खर्च विवरणमा चैत २२ गते ९५ पिस लाइफाबोय साबुन खरिद गरिएको छ, जसको मूल्य ३ लाख ६३ हजार ९८५ रुपैयाँ छ । यसअनुसार एउटा साबुनको मुल्य ३ हजार ८३१ रुपैयाँ ४२ पैसा पर्छ ।
चार दिनपछि ११४० पिस साबुन किनिएको छ, जसको मूल्य ४ लाख ३१ हजार ९५५ रुपैयाँ छ । यसअनुसार एउटा साबुनको मुल्य २९९ रुपैयाँ ९६ पैसा पर्यो । चैत ३१ गते फेरि ६९१२ पिस लाइफबोय साबुन किनिएको छ र २ लाख ३ हजार ८०६ रुपैयाँ खर्च देखाइएको छ । यसअनुसार एउटा साबुनको २९ रुपैयाँ ४९ पैसा पर्यो ।
यस्तै, २२ चैतमा ७ लाख ७ हजार १९२ रुपैयाँमा २८०४ पिस स्यानिटाइजर खरिद गरेको उल्लेख छ । चार दिनपछि नगरपालिकाले फेरि २ हजार ४० पिस स्यानिटाइजर किनेको छ र यसको ६ लाख २२ हजार ४४० रुपैयाँको हिसाब देखाइएको छ । चार दिनको अन्तरमा एक पिस स्यानिटाइजरको मूख्यमा ४७ रुपैयाँ ४५ पैसा फरक परेको छ ।
नगरपालिकाले २८ वैशाखामा ७५ पिस पीपीई गाउन (सिम्पल) किनेको छ, जसको मूल्य २७ लाख ५२ हजार ५०० राखिएको छ । यसहिसावले एक पिस पीपीई सेटको ३६ हजार ७०० रुपैयाँ परेको छ ।
यसैगरी, एक पिस सर्जिकल मास्कको मुल्य झण्डै ८० रुपैयाँ छ भने पञ्जाको मुल्य ७०० बढी राखिएको छ ।
स्रोतः अनलाइनखबर
