खिमराज चालिसे, चंडिगढ ।
रोजी रोटीको लागि लाखौं नेपालीहरु देश छोडेर विदेशका गल्लीहरुमा भौंतारिन बाध्य छन् । परदेशिएका नेपालीमध्ये कतिपयले आफ्नो परिवारका सदस्यसँगै आफ्ना बालबालिकालाई समेत साथमै लैजाने गर्दछन् ।
विदेशी भूमिमा जन्मे हुर्केका बालबालिकाहरु नेपाली भाषा, संस्कृतिप्रति बिस्तारै टाँढिँदै जाने गर्दछन् । उनीहरुको सार संगत आफू बसेकै ठाउँका बालबालिकाहरुसँगै बढी हुने गर्दछ । त्यसले गर्दा नेपाली भाषा र संस्कृति भुल्दै जाने हुन् कि भन्ने चिन्ता प्रत्येक बाबुआमालाई हुने गर्दछ ।
तर, विदेशमा पनि संगठित भइ बसेका नेपालीहरुले जो जहाँ भएपनि आफ्नो चाडपर्वमा मनाउने र संस्कृतिको संरक्षण गर्ने काम गरिरहेका छन् । खासगरी भारतमा मूल प्रवाह अखिल भारत नेपाली एकता समाजले त्यो काम निरन्तर अगाडि बढाइरहेका छ ।
भारतमा मूल प्रवाहको झण्डामुनी गोलबद्ध नेपालीहरुले नेपाली संस्कृति अनुसार तिहारका अवसरमा देउसी भैलो खेल्दै गर्दा नेपालीहरुबीच आत्मियता मात्रै बढेको छैन, नयाँ पुस्तालाई समेत आफ्नो मातृ भूमिको कला, संस्कृति सिकाउने र पुस्तान्तरण गर्ने अवसर मिलेको छ ।
संगरुरमा देउसी भैलो समापन
मूल प्रवाहले भारतब्यापी रुपमा खेलेको देउसी भैलो अन्तर्गत सुदूरपश्चिमोत्तर क्षेत्रको संगरूर नगर समितीले एक भव्य कार्यक्रम गरी भैलोको समापन गरेको छ । कोरोना संक्रमणको जोखिमका कारण घरघर गइ देउसी भैलो खेल्न असम्भव भएपछि मूल प्रवाहका कार्यकर्ताहरु सानो समूहमा सहभागी भइ कार्यक्रम सम्पन्न गरिएको हो ।
नगर उपाध्यक्ष नारायण प्रसाद भुसालको सञ्चालनमा तथा महिला नगर संयोजक लक्ष्मी खनालको अध्यक्षतामा सम्पन्न भैलोमा रामु खनालले स्वागत गर्नुभएको थियो ।
कार्यक्रममा धनबहादुर विक, विन्दु मरासीनि, सरिता भुसाल, हेमन्त मरासीनि र अमृता खनाल लगाएतले भैलो बारे आफ्नो अनुभव प्रस्तुत गर्दै प्रवासमा पनि आफ्नो संस्कृति र सभ्यता चिनाउँदै त्यसप्रति नयाँ पिँढीलाई पनि आकर्षीत पार्ने र भैलोको माध्यामबाट संगठनको आर्थिक पक्ष मजबुत पार्नु नै भैलोको उद्धेश्य भएको बताउनुभएको थियो ।
