काठमाडौं । सत्तारुढ दल नेकपाको सचिवालय बैठकमा सहभागी हुन पार्टी अध्यक्ष एवं प्रधानमन्त्री केपी शर्मा ओली तयार भएका छन् । त्यसका लागि बुधबार दिउँसो १ बजे बोलाइएको मन्त्रिपषिद बैठक १ घण्टा पछि सारिएको छ ।
बुधबार दिउँसो तोकिएको बैठक राख्ने र सार्ने पक्षबीच रस्साकस्सी भइरहेको बेला अर्का अध्यक्ष पुष्पकमल दाहाल प्रचण्ड समूह बैठक गरेरै छोड्ने अडानबाट पछि नहटेपछि ओली बैठकमा सहभागी हुन लागेका हुन् ।
पार्टी अध्यक्ष तथा प्रधानमन्त्री ओली पक्षले सो बैठक सार्न जोड गरिरहेको थियो भने अर्का अध्यक्ष प्रचण्डसहितका बहुमत सदस्यले बैठक गरिछाड्ने अडान लिएका थिए।
दुई पक्षको रस्साकस्सीबीच आज बिहान तोकिएकै समय र स्थानमा राख्ने सहमति भएको हो । अर्थमन्त्री समेत रहेका महासचिव विष्णु पौडेलले कार्यकारी अध्यक्ष पुष्पकमल दाहाल प्रचण्डलाई फोन गरेर अध्यक्ष तथा प्रधानमन्त्री ओली पनि तोकिएको समयमै बैठकमा सहभागी हुने जानकारी गराएका थिए ।
बैठकमा प्रचण्डले ओलीको राजीनामा माग गर्दै सचिवालयमा पेश गरेको लिखित प्रस्तावउपर छलफल हुनेछ । आफू अल्पमतमा परेपछि ओलीले बैठक सार्न वा टार्न प्रयत्न गर्दै आएका थिए । त्यसका लागि आफूपक्षीय नेताहरु परिचालन गरेका थिए भने राष्ट्रपति विद्यादेवी भण्डारीले प्रचण्डलाई शितल निवास बोलाएर छलफल गरेकी थिइन् ।
यसैबीच नेकपाको विवाद मिलाउन चिनियाँ राजदूत होउ यान्छी सक्रिय भएको स्रोतले जनाएको छ । राजदूत यान्छीले मंगलबार मात्रै चार वटा छुट्टाछुट्टै मिटिङ गरेकी थिइन् ।
राजदूत यान्छीले प्रधानमन्त्री एवं नेकपाका अध्यक्ष केपी शर्मा ओलीलाई राति प्रधानमन्त्रीको सरकारी निवास बालुवाटारमा भेटेकी थिइन् भने अर्का अध्यक्ष पुष्पकमल दाहाल प्रचण्ड, वरिष्ठ नेता माधवकुमार नेपाल पक्षका नेताहरु एवं व्यापारी तथा उपाध्यक्ष बामदेवा गौतमसँग चिनियाँ दूतावासका प्रतिनिधिले भेट गरेका छन् ।
दूतावासका प्रतिनिधिहरुले नेकपाका अध्यक्षद्वयसँगै महासचिव बिष्णु पौडेल, उपाध्यक्ष वामदेव गौतम, प्रचण्ड निकट व्यापारी अजेयराज सुमार्गीलगायतसँग भेट गरेका थिए । चीनकै कारण तत्कालीन एमाले र तत्कालीन माओवादी केन्द्रबीचको एकता सम्भव भएको थियो भने पटक पटक टुक्रिनबाट जोगाउँदै आएको छ ।
विभाजनको संघारमा नेकपा : प्रचण्डले सचिवालय बैठक बोलाएकै समयमा ओलीले बोलाए मन्त्रिपरिषद
