काठमाडौं । बिहीबार राति बैतडीमा बस दुर्घटना हुँदा नौ जनाको मृत्यु भएको छ । बैतडीको पाटन नगरपालिका–८ खोड्पेमा भएको दुर्घटनामा ३४ जना घाइते भएका छन्, ती मध्ये आठ जनाको अवस्था गम्भीर छ ।
घाइतेहरुको अहिले डडेल्धुरा अस्पतालमा उपचार भइरहेको छ । ८ जनाको घटनास्थलमै ज्यान गएको र थप एक जनाको उपचारका क्रममा अस्पतालमा मृत्यु भएको प्रहरीले जनाएको छ ।
प्रहरीका अनुसार दार्चुलाको गन्नाबाट महेन्द्रनगर आइरहेको पवनदूत यातायातको ना ५ ख ५१४१ नम्बरको बस खोड्पेमा बिहीबार राति साढे १० बजेतिर दुर्घटना भएको हो।
चार जनाको सनाखत
दुर्घटनामा परी मृत्यु भएका नौमध्ये तीन जनाको सनाखत भएको छ । बैतडीको दोगडाकेदार–६ सित्तडका २५ वर्षीय प्रहरी जवान रणबहादुर चन्द, दोगडाकेदार–६ सित्तडकै २७ वर्षीय करनसिंह ऐर, दोगडाकेदार गाउँपालिकामा कार्यरत कर्मचारी कविन्द्र जोशी र कञ्चनपुरको भीमदत्त नगरपालिका–८ तिलाचौरका १५ वर्षीया किर्तिका कार्कीको सनाखत भएको बैतडीका प्रहरी प्रमुख प्रहरी नायब उपरीक्षक नारायणप्रसाद अधिकारीले जानकारी दिए ।
मृतक चन्द र ऐरको घटनास्थलमै मृत्यु भएको हो भने कार्कीको डडेल्धुरा अस्पतालमा उपचारका क्रममा मृत्यु भएको हो । ऐरको शव बसले च्यापिएकाले निकाल्ने काम भइरहेको प्रहरीले जनाएको छ । अन्य पाँच मृतकको पहिचान हुन सकेको छैन । उनीहरुको शव परीक्षणका लागि जिल्ला अस्पतालमा राखिएको छ ।
बसमा धनगढी, महेन्द्रनगर, बैतडी तथा दार्चुलाका यात्रु रहेको प्रहरीले जनाएको छ ।
