खिम बहादुर बिक, हैदराबाद (भारत) ।
मूल प्रवाह अखिल भारत नेपाली एकता समाजका अध्यक्ष दुर्गाबहादुर केसीले प्रवासी नेपालीलाई आफू कार्यरत स्थानबाटै देशको निर्वाचनमा भोट हाल्न पाउनुपर्ने बताउनुभएको छ ।
मूल प्रवाहको ४२ औँ स्थापना दिवसका अवसरमा मध्य दक्षिण क्षेत्रीय समितिले आइतबार आयोजना गरेको ‘प्रवासी नेपालिहरुको मताधिकारको प्रश्न’ बिषयक अन्तरक्रिया कार्यक्रममा अध्यक्ष केसीले मताधिकारको अधिकार रक्षाका लागि संघर्ष गर्नुपर्ने बताउनुभयो । अन्तर्राष्ट्रिय नेपाली एकता समाजका अध्यक्षसमेत रहेका केसीले प्रवासमा मूल प्रवाहसहित एकता समाजले र देशमा राष्ट्रिय जनमोर्चाले सडक देखि सदनसम्म आन्दोलन गरेको स्मरण गराउनुभयो ।
उहाँले प्रवासी नेपालीहरुलाइ जहाँ छन् त्यहीँबाट मतदानको अधिकारको व्यवस्था गराउनु पर्छ भन्ने माग २०६४ को संविधानसभाको चुनाव देखिनै राख्दै आएपनि सरकारले सुनुवाई नगरेको बताउनुभयो। उहाँले भन्नुभयो, ‘मानव जातिको प्रहिलो अधिकार हो मताधिकार । आजको इन्टरनेटको युगमा आफ्ना नागरिक जो जहाँ छन्, त्यहीँबाट मतदान गर्ने व्यवस्था मिलाउन सकिन्छ । तर, लाखौंलाख नेपालीलाई मतादानबाट बञ्चित गरिएको छ’ । उहाँले अब भारतस्थित नेपालीहरुलाई मताधिकारको सुनिश्चित गराउनका लागि थप सशक्त प्रकारले आन्दोलित हुनुपर्ने बताउनु भयो ।
कार्यक्रममा मूल प्रवाहका कार्यबहाक महासचिव ठाकुर खनाल, केन्द्रीय सचिव प्रेम पौडेल र केन्द्रीय सल्लाहकार सदस्य धनवीर पुनले समेत मन्तव्य राख्नुभएको थियो ।
त्यस्तै, केन्द्रीय सदस्य राम प्रसाद आचार्य, फुलबिना पौडेल, रामकुमार क्षेत्री, रतन सिह बिक र भिम बहादुर थापाको पनि आतिथ्यता रहेको थियो । क्षेत्रीय उपाध्यक्ष रुपलाल जिएमले स्वागत गर्नुभएको कार्यक्रमको सञ्चालन क्षेत्रीय सचिव खिम बहादुर बिक र अध्यक्षता क्षेत्रीय अध्यक्ष राम प्रसाद पौडेलले गर्नु भएको थियो ।
